PANGANDOY SA KASINGKASING

Sa gawas sa nasud adunay usa ka mag-uuma nga nakakita ug itlog sa agila. Tungod kay wala man usab siyay hibangkaagan bahin sa itlog mao nga iya kining gidala ug gipalumloman sa manok.
Sa dihang napiso na ang maong itlog maoy pagtoo sa agila nga sama gayod siya sa ubang mga piso kansang kinabuhi naa diha sa pagpangakha sa ilang pagkaon matag karon ug unya. Hangtud nga natigulang nalang ang maong piso sa agila nga wala jud siya masayod sa tinuod niyang pagkasiya.
Ug usa ka adlaw niana, nakit-an niya didto sa taas nga bahin sa kapanganuran nga naglupadlupad ang usa ka dakong agila…ug diha sa sulod sa iyang kasing-kasing nangandoy siya nga unta mahisama siya sa maong langgam apan gibadlong siya sa mga kauban sa dili pag-ambisyon sa ingon kay dili siya sama niini, hangtud nga namatay gayod ang maong piso sa agila nga wala gani masayod nga siya usa diay ka agila sa iyang kaugalingon.
Mga igsoon, ang nasud sa Israel sa ilang kapanahunan maoy giila ug giisip nga parasan sa Ginoo ug ang Ginoo gayod mismo maoy nag-atiman niini, apan sa paglabay sa taas nga panahon kining maong parasan sa Ginoo nakita niya nga wala mamunga ug maayo busa gipadala niya ang iyang mga propeta aron unta sa paghinlo niini pinaagi sa iyang mensahi diha paghinulsol ug pagbag-o sa ilang kaugalingon apan walay nahitabong kausaban.
Hinungdan nga sa katapusan iyang gipadala ang iyang bugtong anak aron unta pinaagi kaniya kasugdan ang kausaban sa kalibutan. Gani sa ebanghelyo nga atong nadungog karon si Jesus nga mismo ang miangkon nga siya mao ang matuod nga punoan sa parasan ug ang iyang Amahan maoy tig-atiman niini. Ang Amahan maoy tigpamul-ong sa mga sanga aron kini mamunga ug daghan.
Si Jesus mao ang matuod nga punoan sa paras ug ang iyang mga tinun-an mao ang mga sanga. Sama sa iyang giingon, ang sanga makahimo lamang makabunga ug daghan kon una sa tanan magpabilin kini sa punoan.
Kon atong balikan ang estorya bahin sa agila atong nasayran nga by virtue of his birth, sa iya palang nga pagkatawo o pagkapiso siya usa ka gayod ka agila. Apan tungod sa kahimtang nga nahitipon siya sa mga piso sa manok maoy hinungdan nga nagtoo lamang siya nga siya usa ka manok.
Ingon man usab niini ang atong kinabuhi, kita sa sinugdanan pa lang gipakatawo nga iya gayod sa amahan…apan sa dihang nahitipon kita sa kalibutan nagtoo usab kita nga kita iya sa kalibutan. Hinungdan ang atong mga panghuna-huna ug pangandoy kalibutanon. Dili ba tinuod kini?
Kinsa man kanato ang naghuna-huna bahin sa mga butang nga langitnon o sa mga buhat nga sarang makapalangit kanato? Kon duna man tingali apan dyotay lang kay sama ra gud na nga daghan kaayong moangkon nga sila katoliko apan dili sa buhat.
Ang kadaghanan nagapos diha sa trabaho ug panginabuhian. Segi ta ug paningkamot apan sama sa gihapon kanunay’ng short. Short sa budget, sa pagkaon, short sa pagtoo ug short sa panahon kay ultimo gani adlaw o panahon sa pagsimba kasagaran gamiton pa alang sa kaugalingon apan hangtud karon wala man gihapon madato ni moarang-arang ang kinabuhi.
Akong balikon ang akong gisulti sa ubang kapilya sa ubang kapilya nga ang kaluwasan wala gitanyag sa bulangan, diskohan, sa sugalan ug uban pang matang sa bisyo kay ang kaluwasan gitanyag lamang sulod sa simbahan ug sa mga sakramento niini, kay sama gud na kon mopalit ka ug pan adto jud ka mopalit sa panadero, bakery o tindahan kay way baligya niana sa hardware, sa hospital o punerarya.
Hinoon wala man sad na magpasabot nga mga buluhaton sa simbahan mao lamay makapalangit kanato kay dili man sad kaseguruhan nga tungod kay nag-alagad kamo sa simbahan nga segurado na ang inyong kaluwasan. Pero mao nay dakong pangutana kon kining taga simbahan maglisod man gani sa kaseguruhan sa ilang kaluwasan, samot na jud ning talagsa ra nato makita sa simbahan.
Sa katapusan, mao niy giingon sa atong panultihon, walay balibaray ug wala say pugsanay. Kini mao ang tanyag sa Ginoo alang kanato karong adlawa it’s either magpabilin kamo kanako aron makapamunga kamo ug daghan or ang dili magpabilin mahisama sa usa ka sanga nga ibalibag ug Malaya, pamuniton kini ug dauban!
Wala man tuod niy balibaray ug way pinugsanay pero mao na ang lintunganay sa atong pagapilion kay bisan ganing kadtong mga sanga nga nagpabilin sa punoan matud ni Jesus kinahanglan paman pul-ungan aron mamunga.
Dili unta kita makatugot nga sama sa usa ka piso sa agila mamatay nalang nga dili gani masayod sa iyang tinuod nga pagkasiya…sama sa akong giingon kita sa sinugdan iya gayod sa Amahan busa maningkamot usab kita nga magpabilin kanunay diha sa presensiya sa Amahan. Ang pangutana kon andam naba kita sa pagpamul-ong sa Ginoo?

ALANG SA MGA KAABAG

Ang panultihon ni Jesus nagkanayon, si kinsa kadtong magpataas sa iyang kaugalingon ipaubos apan kadtong magpaubos sa iyang kaugalingon diha sa pag-alagad ipataas.
Sa laing bahin usab sa atong kontexto karong mga panahuna atong nasinati usab nga ang nagpaubos sa iyang kaugalingon nahimo gayod nga ulipon tungod kay basta gani mahimo na sila nga leader sa atong katilingban sila naman usab ang gisaligan nato sa tanan ug ang molihok sa tanan, gawas nga nahimo na silang ulipon nahulog nalang pod hinoon nga pangdaug-daug ang atong gibuhat alang kanila.
Sa akong kasinatian lang, human sa misa kasagaran nga paampuon kon dunay kasal o dili ba kaha bunyag ug bisan unsang okasyon ang pari maoy paampuon nga mura ug pari lang ang makamaong mag-ampo ug tingali mao usab kini ang nahitabo sa mga lumilihok sa kapilya nga ang kasagarang naglihok kadto lang usab ang may katungdanan hinungdan nga gamay na lang o wala na gani’y mobolontaryo nga mag-alagad kay panahon nga magpili na ug mga tawo alang sa maong katungdanan daghan ang mobalibad kay wa lagi’y panahon ug busy sa panginabuhian kay unsaon nga gawas niana makita man usab nga walay suporta ang katilingban.
Busa una sa tanan, atong pasalamatan kining atong mga igsoon nga bisan paman tuod kon taliwala sa kalisod sa pag-umol ug tawo labaw sa tanan diha sa pagdumala kanila ilabina diha sa mga buluhaton sa simbahan gitahan nila ang ilang kaugalingon. Busa hangyoon ko usab kamo, kamo nga sakop niining maong katilingban sa pagsuporta kanila sa tanang aspeto dili lamang sa moral kon dili apil na usab niini sa pinansyal. Angay natong hinumduman nga sa ilang pagtahan sa ilang kaugalingon gihimo nila kini sa walay pagpangayo ug bayad, sa walay pagpanuko nga mobiya sa ilang pamilya bisan pa man kon ang ilang pagaadtuan daw walay kasegurohan tungod kay mga meeting ug seminar nga ilang tambungan wala man sila hatagi ug kwarta didto kon dili mga pagtulon-an busa dasigon unta ninyo sila pinaagi sa inyong pagtabang kanila, sa pagpaminaw kanila diha sa ilang mga hangyo ug mga mensahe.
Sa katapusan, tinuod nga diha sa ilang kinabuhi dili man usab sila hingpit kay daghan usab sila ug mga kakulangon isip tawo hinaot unta nga inyong masabtan ang tanan as long as ang ilang gibuhat tolerable dili illegal ug immoral. Angay ninyong hinumduman nga wala man magpili ang Ginoo ug mga anghel aron maoy iyang mahimong pari o kaabag, wala niya pilia sila nga mga angayan apan gihimo niyang angayan kadtong iyang gipili aron nga pinaagi sa kinabuhi niining mga tawo nga giisip nato nga dili angayan, ikapadayag ang iyang himaya.
Alang usab sa mga kaabag, dili kini usa ka passes alang kaninyo nga tungod kay may pagsabot ang mga tawo kaninyo magpatuyang nalang usab kamo labaw sa tanan magpasagad ba hinoon sa inyong katungdanan, angay hinumduman nga kamo igo lamang nga miambit niining maong buluhaton busa paningkamot usab kamo nga dili kaulawan ang nagpadala kaninyo nga mao ang Ginoo.
Labaw sa tanan sunda ninyo ang panig-ingnan ni Kristo nga mianhi siya sa kalibutan dili aron alagaran kon dili aron sa pag-alagad kay ang ilhong dako sa atubangan sa Dios dili man kadtong gialagaran kon dili ang nag-alagad...
Hinaot pa unta...

THE EMPTY TOMB

Kung nakapaminaw mo sa pasyon nga gibasa niadtong Byernes Santo masayran ninyo nga gipahiluna nila ni Jose nga taga Arimatea ug ni Nicodemo si Jesus sa usa ka lubnganan nga wala pa kalubngi. May mga pamalandong nga nag-ingon nga bisan tuod kon si Jesus maoy tag-iya sa tanan by virtue of His being isip anak sa Amahan apan bisan pa niana wala siyay luna nga iyaha gani gilubong siya sa lubnganan nga dili iya.
Tungod niini nagkinahanglan gayod nga mabanhaw siya kay sumala pa sa mga pasiaw bawion na daw sa tag-iya ang gilubngan kaniya. Ingon niana jud kakabus ang atong Ginoo. But for what ever reason, alang kanato nga nagtoo kaniya hugot usab ang atong pagtoo nga nabanhaw siya dili tungod kay dili siya maoy tag-iya sa gilubngan kaniya kon dili tungod kay kini maoy pagbuot sa iyang Amahan sumala usab sa gipadayag sa transfiguration scene aron nga pinaagi sa iyang pagkabanhaw ang tanan makabaton usab sa samang paglaom nga ang tanang nangamatay diha sa pagtoo ug pinasubay usab sa mga sakramento sa simbahan sama kang Kristo mabuhi pag-usab ngadto sa usa ka kinabuhi nga wala nay katapusan.
Hinaot nga padayon unta kitang maghupot ning maong paglaom hangtud nga moabot na usab kita sa gisaad nga pagkabanhaw uban sa atong Ginoo.

THE END DOES NOT JUSTIFY THE MEANS

Sa dihang gisekrito unta sa pagtabang nila ni Santino ang inahan ni Rico nga nadigrasya sa teleserye nga may bukas pa, nasuko si Fr. Jose sa bata tungod sa pagkat-on niini sa pagpamakak. Matud pa ni Santino nga iyang gibuhat nga paglilong kang Fr. Jose aron pagtabang unta, nahimong usa ka sayop...apan alang kang Santino di pa siya makasabot nganong sayop ang iyang gihimo tungod kay kanus-a man diay mahimong sayop ang pagtabang? Dili man tingali sayop dili ba? Sa inyo kahang huna-huna?
Maanindot kaayo ang pagpasabot ni Bro kang Santino nga dili usab maayo nga motabang ka sa tawo sa dautang paagi. Kung baga sa English this is what they call that the end does not justify the means. Buot ipasabot nga dili tungod kay nakatabang sa tawo ok na lang bisan kung ang imong gihimo dautan sama pananglitan sa gihimo ni Robinhood nga nanulis siya sa mga dato ug ang iyang gitulis iya usab nga gitabang sa mga kabus. Dili man sayop ang pagtabang, apan dili pod unta kita maghimo ug laing sayop aron ilhon nga husto ang atong gihimo nga pagtabang.
Kini mao ang nahitabo karon sa ebanghelyo nga tungod sa ilang paningkamot nga katabunan ang ilang mga sala sa ilang kaugalingon, ang mga pariseo naningkamot gayod unsaon pagpildi kang Jesus pinaagi sa pagpangita ug sayop sa iyang gihimo aron ilang ikapasangil.
Sumala pa sa pagbasa nga pinaagi ni Caifas ang pangulong pari kaniadto nagkasabot sila nga patyon si Jesus kay maayo pa nga isakripisyo ang usa ka kinabuhi aron pagluwas sa daghan. Apan ang wala hinoon nila masayri nga pinaagi hinoon sa kamatayon sa usa nga naluwas ang daghan. Sama sa nahitabo sa kinabuhi ni Ninoy nga tungod sa iyang kamatayon mao hinooy nakapahigmata sa mga Pilipino aron maghugpong ug himoon makasaysayang hitabo sa tibuok kalibutan nga mao ang people’s power.
Mga igsoon hapit na usab ang election, ang akong pahinumdom mao nga dili unta nato gamiton nga rason ang atong kalisod sa kinabuhi aron modawat ug ibaligya ninyo ang inyong buto tungod sa bisan unsang hinungdan. Kini unta maoy maghatag kanato ug igo nga higayon aron paghatag ug dignidad sa atong mga buto, paghatag ug dignidad sa atong pagkatawo labaw sa tanan aron sa paghatag ug maayong ihemplo ngadto sa inyong mga anak. For again, the end does not justify the means.
Tinuod dili man nato masinati ang hingpit nga kausaban sa pagkakaron pero at least kung moabot ang panahon nga mangutana ang inyong mga anak kung unsay inyong gihimo panahon sa election you can honestly claim nga mibutar ko sumala sa akong konsensiya ug dili sumala sa gidak-on sa kwarta! Aron dili pod ta unya kapaninglan sa mga ulahing henerasyon for not showing them a good example to follow.
Kon tinuod gayod nga kita mga gawasnon diha sa pagpili mahimo pod unta kitang gawasnon sa pagdawat sa sangputan sa maong desisyon. Padayon unta kitang mag-ampo alang sa dugang lamdag sa pagpili ug paghimo ug desisyon pinaagi sa tabang sa atong Patron San Vicente Ferrer aron sama kaniya makahimo usab kita sa pagbuhat sa kabubut-on sa atong langitnong Amahan.
Hinaot pa unta…

JACKPOT PRIZE

Usa ka karaan nga pasiaw nga akong nadungog naghisgot bahin sa kaihimtang diin nakadaog sa lotto ang usa ka tigulang sa jackpot prize balor ug ug 350 million. Nagproblema na karon ang mga anak unsaon nila sa pag-estorya ang ilang amahan kay basin unya tungod sa tumang kalipay ug atakihon unya sa sakit sa kasingkasing ug mamatay.
Busa nagpakitabang sila sa pari kung unsaon. Ug tuod man, sa didto na sila sa pari, ang pari miingon nga siya na ang bahala sa pag-estorya sa ilang amahan sa maong balita. Sa didto na ang pari sa balay sa maong tigulang miingon siya, tay kining unsa may imong buhaton kung pananglit lang ha nga nakadaog ka sa lotto ug mga 50 thousand, unsa may imong buhaton?
Ang tigulang pasimply lang pod ug miingon kung nakadaog ko nianang kantidad padri ang akong buhaton mao jud ang pagpasalamat sa Ginoo ug agi’g pagpasalamat akong ihatag sa simbahan ang 25%. Miingon na usab ang pari, pananglit kung midaog ka ug mga 150 milyon unsa may imong buhaton? Medyo midako-dako na ang kantidad nga iyang gibungat. Apan mao gihapon ang gitubag sa tigulang. Busa misulti na jud ang pari sa tiunod nga kantidad nga gidag-an sa tigulang ug ning higayuna medyo nausab ang huna-huna sa tigulang ug miingon, pananglit ug makadaog ko ug 350 milyon padre akong ihatag ang katunga sa akong daog sa simbahan. Na shock ang pari ug tungod niini diya hinoon ang gitabang kay siya naman ang nakuyapan!
Mga igsoon, ang pagkabanhaw sa atong Ginoo gikan sa kamatayon ngadto sa kinabuhi labaw pa kay sa nakadaog ka ug 350 milyon sa lotto. Ug tingali alang sa mga tinun-an maglisod sila pagsabot sa kahulugan sa pagkabanhaw apan mitoo sila tungod kay mao may ilang nakita.
Sikat kaayong kining panultihon nga nagkanayon “To see is to believe.” Or at least, motuo ka ug modawat kung makakita ka di ba? Apan ang pangutana tinuod ba gud na? Well, ang mga philosophers moingon nga dili kana tinuod or sayop ang maong panultihon. Kung makakita ka giingon nga nasayod ka. Dili ba kung nasayod ka ang imong isulti “Now I see.” Buot ipasabot nga mitoo ka karon tungod kay nasayod ka dili pinasikad sa unsay gisulti sa uban kon dili tungod sa imong nakita. Busa ang husto unta nga isulti “To see is to know.”
Apan sa ebanghelyo karon nga atong nadungog kining tulo ka mga tinun-an nga nangadto sa lubnganan, sila si Maria Magdalena, si Pedro, ug Juan giingon nga nakakita sila ug mitoo. Kung kini ang atong gamiton nga pruweba murag husto tuod ang giingon “To see is to believe” apan ang tubag nga dili gihapon husto tungod kay ang gituohan ni Juan dili man ang iyang nakita.
Ang nakita ni Juan nga wala didto si Jesus sa lubanganan apan nagtuo siya sa presensiya sa Ginoo. Nakita niya ang walay sulod nga lubnganan apan mitoo siya sa kinatibuk-an sa pagkabanhaw.
Sa higayon nga iyang nakita ang puting panapton nga tua didto nabilin sa lubnganan, si Juan wala magtan-aw sa patay nga Kristo apan nagtoo siya sa nabanhaw’ng Ginoo. Nagtoo siya sa wala niya makita.
Kini usab ang hagit alang kanato karong adlawa nga bisan tuod kon wala na nato makit-i si Jesus nga naglakaw sa atong taliwala nagtoo kita kaniya. Nagtoo kita sa usa ka Dios nga nagpakatawo, mipuyo uban kanato, namatay sa krus ug nabanhaw ngadto sa kinabuhing walay katapusan.

AT HOME

Dunay usa ka piriko kana bitaw’ng langgam nga makahibalo mosulti ang nakaapan lang kay hinawayon kaayo. Usa niana ka adlaw sa dihang milabay ang ilang silingan nga babaye… natingala siya kay adunay nanitsit…pssst…usa ka langgam nga piriko ug sa dihang nangutana siya nganong nanawag siya, ang langgam miingon pangit…pangit.
Sa sinugdanan wala lang niya baliha ang estorya sa langgam apan sa kadugayan iyang giestoryahan ang tag-iya bahin sa kinaiya sa iyang langgam aron madisiplina. Tuod man sulod sa tulo ka bulan wala na makita ang langgam sa iyang silingan apan usa ka buntag niana sa iya napod nga paglabay sa iyang silingan iya napod nadungog ang sitsit sa langgam….pssst, psst. Ngano naman sad, nangutana siya? Ang langgam mitubag well kabalo naka…
Ang pagbasa karong adlawa ilabina sa ebangehelyo kon nakabantay mo pareha sa kagahapon ug nakahuna-huna ko nga di nalang ko magwali total nadungog naman ninyo ang akong pamalandong kagahapon…nakabalo na bitaw mo…
Sa dihang giandam sa Dios ang mahal nga birhen Maria nga mahimong pinuy-anan sa iyang anak I’m sure nga gihimo kini sa Dios aron mahimong at home ang iyang anak dinhi sa kalibutan…kay kana bitaw panahon nga adunay mamisita sa atong panimalay moingon man ta please feel at home, pakasusamaha nga imong ning balay tungod kay sa atong pagsulti sa ingon gusto nato nga mahimong gawasnon ang atong mga bisita…ug ang mahal nga birhen Maria nahimo siyang matuod nga pinuy-anan sa anak sa Dios tungod kay na at home ang Ginoo kaniya.
Nahimong gawasnon ang Dios sa iyang kinabuhi tungod sa iyang pagsanong ug paghatag sa iyang kaugalingon ngadto sa plano sa Dios, pinaagi sa iyang mapaubsanong pagsugot sulugoon ako sa Ginoo mahitabo unta kanako ang imong gisulti.
Ang Ginoo bitaw bisan sa iyang pagkagamhanan wala jud maglapas sa atong tawhanong katungod nga bisan pa kon mahimo niya ang tanan apan bisan kanus-a wala jud siya molapas niini. Nga bisan ug unsaon niya nga madani ang tawo ngadto kaniya apan kon dili ug mobalibad gayod ang tawo, wa siya’y laing mahimo gawas sa pagtamod sa desisyon sa tawo.
Busa ang atong paningkamutan sa pagkat-on mao unta ang kinaiya nga gipakita sa mahal nga birhen Maria nga kanunay untang bukas ang atong kasing-kasing sa Ginoo nga ma ta home unta ang Ginoo sa atong pagkatawo labaw sa tanan kita pod unta nga mahimong at home ngadto sa Ginoo.
Ikaduha nga punto nga akong nakita, sa proseso sa ilang panag-estroyahay tali sa Mahal nga birhen ug sa anghel sa Ginoo, wala jud siya lung-i sa anghel hangtod nga mitando si Maria ug bisan pa ug wala kaayo makasabot si Maria mitando siya, matuman unta kanako ang imong gipamulong ug diha pa mibiya ang anghel kaniya...
Sa akong pamalandong, ang tawag sa Ginoo consistent jud ug dili mabalhinon ug dili mag-usab2x ug labaw sa tanan persistent pod nga ang iyang pagtawag makanunayon ug magpabilin hangtud nga kanus-a ta mahimong gawasnon sa iyang tawag alang kanato.
Tan-awa ang kinabuhi ni Propeta Jonas nga bisan giunsa niya sa pagbalibad sa Ginoo ug pagpahilayo kaniya apan tungod kay gitawag siya sa Ginoo, ang Ginoo mangita gayod ug paagi. Hinungdan nga nagtoo ako nga kon ang Ginoo na gani ang motawag dili gayod siya mohunong hangtud nga dili ka mosanong…ug para nako dili pod unta ta magdinalo sa atong kaugalingon ngadto sa Dios kay ug ayha pa ta moalagad sa Ginoo ug magsungkod na ta unsa may kalainan niana karon nga himsog pa ta? Kon makahimo ka pagtando sa umaabot nganong dili man karon? Di ba dapat ang atong ihatag balik sa Dios kadto mang pinaka da best?
Sa dihang gisukna nako ang akong uyab kaniadto kanus-a man ko nimo sugton? Miingon siya ugma nalang…busa ako siyang gipangutana unsa may kalainan ana karon ug sa ugma? Kon makahimo ka ug desisyon karon, I mean kon sugton ko nimo ugma or i-basted kaya nganong dili man karon? May gani kay nadala ra labi na kay ako siyang gikantahan ug malayo pa ang umaga hehe…
Practically wala may kalainan niana apan gusto lang ta nga magpaabot ang uban…ug sa makausa pa mobagting na sad sa akong panumduman ang panultihon ni kanhi Presdenti Mañuel Roxas nga nagkanayon, “Huwag mong ipagbukas pa ang magagawa mo ngayon”. Ato na untang ihiklin ang Mañana habit tungod kay karon na ang panahon kay lisod ug mahutdan na ta ug ugma kay nila pa bitaw maayo pa man kuno ning manok ug mamatay kon ihawon kay kaunon pa sa tawo apan kon ang tawo nay mamatay kaunon ra intawon sa wati…hinaot pa unta nga mahimong magmabungahon ug magmabulukon ang atong pagpuyo sa atong kinabuhi dinhi sa kalibutan…

WALA MASIPYAT ANG GINOO

Niining taas nga talaan sa kagikan ni Jesus buot lamang ipakita kanato sa mga manunulat kining mosunod nga mga punto.
1. Una, Si Jesus mao gayod ang gisaad nga katumanan sa mga panagna sa mga propeta nga moabot aron magsilbing kahayag alang kanato, aron pagdala ug bag-ong paglaom taliwala sa atong daw dili na masabot nga kahimtang karon, aron sa paghatag kanato ug igong kadasig nga makapadayon kita sa pagpaningkamot sa pagpakabuhi nga matarong, maampuon, ug maalagaron ngadto sa uban bisan paman kon usahay kawad-an na kita ug inspirasyon sa pagbuhat niini.
2. Ikaduha, nga sa kataas sa panahon ug gani mikabat na ug 80 ka henerasyon ang milabay sukad mugnaa sa Dios ang kalibutan ug ang tawo apan ang pagpakatawo sa iyang bugtong anak maoy kamatuoran nga bisan kanus-a wala hikalimti sa Dios ang iyang gisaad ug hangtud karon, ang Dios padayon gihapon nga mopatuman sa iyang saad sa pagdala balik ngadto kaniya sa tanang mga tawo ug sa tibuok kabuhatan sigon sa iyang plano ug sa pag-abot sa takdang panahon.
3. Ikatulo, nga wala masipyat ang Dios sa iyang plano sa pagpadala sa iyang anak two thousand years ago aron nga mopuyo, mosinati ug makig-uban kanato sama sa usa ka tawo bisan paman sa iyang pagka Dios. Ug kana tungod kay ang plano sa Ginoo kanunay man gayod nga on time and always in the right time
4. Ikaupat ug katapusan, nga wala usab masipyat ang Ginoo sa iyang desisyon ug sa iyang plano nga matawo kita sa panahon nga iyang gitagal, matawo sa atong mga ginikanan mosinati sa ilang pag-amuma ug pagmahal luyo paman sa ilang tawhanong kakulangon, apan gipili sila sa Dios aron nga pinaagi kanila mabuhi kita sa kalibutan. Wala masipyat ang Dios sa pagpili kanato aron maiya ug mahimong sakop sa simbahan luyo paman sa atong kakulangon, ug bisan paman sa atong pagkamakasasala. Gipili kita sa Dios dili tungod sa atong mga katakos kon dili tungod kay nasayod siya nga pinaagi sa atong pagkakita, He can bring out the best in us. Nagkinahanglan lamang kita mga igsoon nga mamalandong kon unsa kaha ang ipasabot kanato niining tanan, unsa kaha ang kabubut-on sa Dios alang kanato ug unsa man usab ang atong mabuhat alang sa buluhaton sa Dios ug sa iyang plano kanato…
Sa katapusan, bisan paman tuod kon madugay-dugayan ang pag-abot sa gisaad sa Dios mahuptan ta unta ang paglaom ug ang kadasig nga sa madugay man o madali tumanon gayod sa Dios ang iyang gisaad…