ANG MAKALUWASNONG PAGTOO

Sa milabay nga mga pagbasa sa ebanghelyo kanunay natong madungog nga si Jesus nag-ayo sa mga masakiton. Giayo niya ang mga giyawaan, ang mga buta, ang mga sanlahon ug karon sa pagbasa sa ebanghelyo giayo niya ang tawo nga paralitiko.
Basi sa atong mga nakita sa mga tawo nga naparalisa, maglisod jud sila sa ilang kaugalingon sa paglihok o pagbuhat sa gusto nilang buhaton sa ilang kaugalingon.
Ingon niini ang kinabuhi ni Fr. Mestdag kanhi, sulod sa napulo kapin nga mga katuigan giatiman siya sa mga tawo nga miunong kaniya hangtud sa katapusan sa iyang kinabuhi. Sila mao na ang magligo, mag-ilis sa iyang sinina, mag-ilis sa iyang diaper ug uban pa tungod kay sa iyang kahimtang mura siya’g buhi nga patay ug maoy akong pagtoo nga sama usab niini ang kahimtang niining tawo nga paralitiko nga giyayungan sa mga tawo.
Natandog si Jesus dili sa ilang gibuhat nga pagdayong sa masakiton ug ang ilang pag-abli sa bubong sa balay kon dili natandog siya tungod sa dakong pagtoo niining mga tawhana. Pinaagi sa ilang dakong pagtoo nga miingon si Jesus gipasaylo na ang imong mga sala. Gisulti ni Jesus kini tungod sa ilang naandan nga huna-huna nga ang pisikal nga sakit adunay kalabutan sa sala nga nahimo sa tawo.
Sa laing bahin, ang mga Pariseo usab nga tua didto imbis nga malipay, nagbagulbol hinoon sa gipamulong ni Jesus kay alang kanila way lain nga makapasaylo ug sala gawas sa Dios ug kana ang dili nila madawat!
Apan aron kamo motoo nga ang anak sa Tawo may gahom dinhi sa yuta sa pagpasaylo ug sala, miingon siya sa tawong paralitiko; bangon, tindog bitbita ang imong banig ug pauli sa inyo.
Gihimo ni Jesus kini dili lang aron pagpakita sa iyang gahom ug paghatag ug pruweba sa alang sa mga pariseo kon dili labaw sa tanan aron sa pagguba sa ilang panglantaw...nga ang pisikal nga sakit alang kang Jesus walay kalabutan sa sala sa tawo.
Ikaduha nga gipadak-an ni Jesus mao ang pagtoo, ang pagtoo sa upat ka tawo nga nagyayong sa masakiton ug ang pagtoo mismo sa paralitiko nga maoy nahimong pundasyon sa iyang pagkaayo.
Ikatulo nga punto nga gihatagan ni Jesus ug gibug-aton mao nga ang kaayuhan naa maggikan sa atong kaamguhan sa atong kaugalingon. Si Jesus uban sa mga tawo sulod sa balay, ang masakiton gipasulod sa balay aron mamaayo, ang mga Pariseo bisan tuod kon atua sa sulod sa balay apan ang ilang pagbati atua sa gawas hinungdan nga wala nila makita ang kaaliman nga nahitabo ug sa makausa pa kining mga ordinaryong mga tawo hinoon maoy midawat sa gahom sa Dios sa ilang taliwala!
Sa katapusan, ang pinaka importante nga atong maamguhan sa mga pagbasa mao ang kabililhon sa pagpuyo sa atong kinabuhi diha sulod sa katilingban. Ang tawong paralitiko naayo dili lamang pinaagi sa iyang pagtoo kon dili pinaagi usab sa pagtoo sa mga tawo nga nagdayong kaniya.
Kita usab usahay daw nahisama sa tawong paralitiko nga maglisod sa paglihok sa atong kaugalingon lamang paningkamot hinaot nga makabaton usab unta kita ug mga higala ug katilingban nga moagak kanato ngadto sa atubangan ni Jesus.
Busa buot akong magpasalamat kaninyo, kamo nga maoy akong katilingban dinhi sa Payao tungod kay nagtabang usab kamo sa daghang mga paagi sa pag-agak kanako ngadto sa sabakan sa atong Ginoo. Maoy akong pag-ampo ug panghinaot nga unta anaa kamo kanunay kay sama sa akong ginaingon, ang akong pagkapari makabaton lamang ug tinuod nga kahulugan uban kaninyo, diha kaninyo, ug pinaagi kaninyo...