Sa kagustuhan nga masayran nila unsay ilang mahimong kaugmaon nagkasabot si Pedro ug Juan nga magpatagna unsay ilang mahimong kapalaran. Tuod man sa didto na sila miingon ang mananagna nga madato si Juan samtang si Pedro giingnan sa tigulang nga bisan ug unsaon nimo Pedro di jud ka moansenso.
Pag-uli sa ila, si Pedro tungod kay nasayod man unsay iyang mahimong kapalaran naningkamot kutob sa iyang mahimo nga makapundar hangtud nga nakaeskwela siya, nakahuman, nakatrabaho, naminyo ug medyo nahayahay kay nakaasawa man siya ug maestra. Matud pa nila kon makaasawa kuno ug maestra karong panahuna hayahay naman kay bisan abag-abagan nalang ug pananggot ug guma fights na!
Samtang si Juan tungod kay naghinalig nga madato siya walay laing gihimo, galingkod-lingkod lang, segi dula ug baraha, tong-it ug tsikitsa, usahay pod sideline siya ug compute sa swertres may nalang makatarget diay….
Sa laktod nga pagkasulti mga igsoon 20 years human sila magpatagna sa ilang kapalaran, si Pedro maoy nadato ug si Juan ang napobre ngano man? Tungod kay ang kapalaran sa tawo wala mag-agad sa atong mga palad kon dili kon giunsa nato sa pagpaningkamot! Amen….
Dunay daghan niini karon sa atong katilingban nga dali ra kaayong mahugno, imbis kay gamay pa ug kinitaan dili kaayo hinoon maningkamot ug kanunay nga magbagotbot, daghag reklamo sa kinabuhi. Apan kadto bitaw mga arangan mao pa hinooy kugihan.
Dunay daghan nga mas mopili pa nga ilubong sa yuta o dili gamiton ang ilang mga kahanas kay nahadlok man nga moresgo ug kini mao ang lingtunganay sa ebanghelyo sa pag-ingon ni Jesus nga ang may iya hatagan pa ug dugang ug makabaton siya ug labaw pa sa iyang gikinahanglan, apan ang walay iya, bisan gani ang diyutay nga iyaha kuhaon pa gikan kaniya.
Tingali ang uban kaninyo moingon unfair tungod kay sa sinugdanan palang nadungog nato nga dili managsama ang paghatag sa tag-iya sa puhunan ngadto sa iyang mga sulugoon kay ang usa gihatagan niya ug 5 ka libo, ang usa gihatagan niya ug 2 ka libo ug ang lain pa 1 ka libo.
Murag makaingon kita nga murag tinuod bitaw nga dili makiangayon ang Ginoo kay bisan gani sa atong palibot makita man nato mismo kon giunsa sa pagbahin sa Ginoo ang iyang gihatag kanato.
Kaniadto samtang nag-eskwela pa ko sa college nakapangutana jud ko sa akong kaugalingon kon giunsa man pagbahin sa Ginoo ang iyang grasya kay dunay mga tawo nga dato kaayo, sakto ug barog, bright, daghag mga talento, nindot mokanta ug gwapa pa jud…samantalang ako, igo2x ra ang kahibalo, dili pod kaayo gwapo, apan bawi lang kay buotan man…
Diha sa atong katilingban kon nakabantay mo kinsa gani to ang mga tawo nga duol sa simbahan o lumilihok sa simbahan, nag-ilaid intawon sa kalisod…samantalang kadtong talagsa ra nato makita sa simbahan ug mapugos nalang pagsulod kay gidayungan naman murag mao pa hinooy gi grasyahan…unfair di ba?
Apan sumala sa giingon sa ebanghelyo ang matag usa ka sulugoon gihatagan sa amo ug puhunan sumala sa iyang katakos…ug sama sa akong giingon wala mag matter kon nakadawat ka ug 5 ka libo, 2 ka libo o usa ka libo tungod kay ang sukdanan nianang tanan kon giunsa ta kini sa pagpalambo o pagpatubo…labaw sa tanan angay tang hinumduman nga ang gihatagan ug daghan paninglan usab ug daghan ug ang gihatagan ug diyutay paninglan usab ug diyutay ra….
Busa angay tingali nga mamalandong kita kon ang ato bang gihatag balik sa Ginoo igo ba nga tugbang sa iyang gihatag kanato? O basin biya kon ang atong gihatag ngadto sa Dios kadto lamang mga salin o sobra sa atong gikinahanglan?
Ang bibliya nagsulti kanato pinaagi sa mga kasinatian sa mga Israelita nga ang atong ihalad ngadto sa Dios kadtong unang abot sa atong mga uma, kadtong mga pinatambok nato nga hayop. Sa ato pa kadtong pinaka da best!
Apan unsa may atong gihimo? Ang atong gihatag sa Ginoo usahay kadto mang dili na mahalin sa merkado. Sa akong misa sa mga barrio usahay dunay mga tawo nga moingon pasensiya na jud dre kay krisis jud kaayo gamay ra ang among halad….
Para nako ang halad dili man kinahanglan kanunay kwarta kon dili bisan unsa nga mahimong magamit ninyo sa inyong balay, magamit pod na namo dinhi sa parokya. Pananglitan, sabon, asin, asukar, tuyo, suka, utanon, lagutmon, dahon sa gabi, puso saging ug uban pa.
Busa dili nata magpaabot nga madato ta ayha pa ta mopaambit kay basin unya ug mapareha kita sa sulugoon nga inay ipatigayon ang usa ka libo gilubong hinoon sa yuta...hinungdan nga gilabog hinoon siya sa gawas ug ingon usab niini ang mahitabo kanato kon magdumili kita sa pagpatigayon, sa pagpaambit sa unsay gihatag kanato.
Sa mga retreat nga akong gihatag sa high school dunay mga bata nga pobre nga mopadayag sila nga nindot jud unta kon dato sila kay naa ang tanan, ug dunay mga dato usab nga mga bata nga moingon nga unsaon man ang kadato kon dili ka malipayon? Hinungdan nga nakapalandong ko nga ang kalipay wala mag-agad sa kadagaya sa kinabuhi kay bisan kon pobre ang tawo apan kon kontento siya mahimo siyang magpuyo nga malipayon.
Busa ang pangutana karon, asa kaha niining tulo ka mga sulugoon nato nakita ang atong kaugalingon?
Hinaot unta nga sa katapusan inigbarog nato sa atubangan sa Ginoo moingon siya maayo ug buotan nga sulugoon…sanglit kasaligan ka man, piyalan ko ikaw sa daghang mga salapi. Dali sulod ngari ug ambit sa akong kalipay….
No comments:
Post a Comment