PANGANDOY SA KASINGKASING

Sa gawas sa nasud adunay usa ka mag-uuma nga nakakita ug itlog sa agila. Tungod kay wala man usab siyay hibangkaagan bahin sa itlog mao nga iya kining gidala ug gipalumloman sa manok.
Sa dihang napiso na ang maong itlog maoy pagtoo sa agila nga sama gayod siya sa ubang mga piso kansang kinabuhi naa diha sa pagpangakha sa ilang pagkaon matag karon ug unya. Hangtud nga natigulang nalang ang maong piso sa agila nga wala jud siya masayod sa tinuod niyang pagkasiya.
Ug usa ka adlaw niana, nakit-an niya didto sa taas nga bahin sa kapanganuran nga naglupadlupad ang usa ka dakong agila…ug diha sa sulod sa iyang kasing-kasing nangandoy siya nga unta mahisama siya sa maong langgam apan gibadlong siya sa mga kauban sa dili pag-ambisyon sa ingon kay dili siya sama niini, hangtud nga namatay gayod ang maong piso sa agila nga wala gani masayod nga siya usa diay ka agila sa iyang kaugalingon.
Mga igsoon, ang nasud sa Israel sa ilang kapanahunan maoy giila ug giisip nga parasan sa Ginoo ug ang Ginoo gayod mismo maoy nag-atiman niini, apan sa paglabay sa taas nga panahon kining maong parasan sa Ginoo nakita niya nga wala mamunga ug maayo busa gipadala niya ang iyang mga propeta aron unta sa paghinlo niini pinaagi sa iyang mensahi diha paghinulsol ug pagbag-o sa ilang kaugalingon apan walay nahitabong kausaban.
Hinungdan nga sa katapusan iyang gipadala ang iyang bugtong anak aron unta pinaagi kaniya kasugdan ang kausaban sa kalibutan. Gani sa ebanghelyo nga atong nadungog karon si Jesus nga mismo ang miangkon nga siya mao ang matuod nga punoan sa parasan ug ang iyang Amahan maoy tig-atiman niini. Ang Amahan maoy tigpamul-ong sa mga sanga aron kini mamunga ug daghan.
Si Jesus mao ang matuod nga punoan sa paras ug ang iyang mga tinun-an mao ang mga sanga. Sama sa iyang giingon, ang sanga makahimo lamang makabunga ug daghan kon una sa tanan magpabilin kini sa punoan.
Kon atong balikan ang estorya bahin sa agila atong nasayran nga by virtue of his birth, sa iya palang nga pagkatawo o pagkapiso siya usa ka gayod ka agila. Apan tungod sa kahimtang nga nahitipon siya sa mga piso sa manok maoy hinungdan nga nagtoo lamang siya nga siya usa ka manok.
Ingon man usab niini ang atong kinabuhi, kita sa sinugdanan pa lang gipakatawo nga iya gayod sa amahan…apan sa dihang nahitipon kita sa kalibutan nagtoo usab kita nga kita iya sa kalibutan. Hinungdan ang atong mga panghuna-huna ug pangandoy kalibutanon. Dili ba tinuod kini?
Kinsa man kanato ang naghuna-huna bahin sa mga butang nga langitnon o sa mga buhat nga sarang makapalangit kanato? Kon duna man tingali apan dyotay lang kay sama ra gud na nga daghan kaayong moangkon nga sila katoliko apan dili sa buhat.
Ang kadaghanan nagapos diha sa trabaho ug panginabuhian. Segi ta ug paningkamot apan sama sa gihapon kanunay’ng short. Short sa budget, sa pagkaon, short sa pagtoo ug short sa panahon kay ultimo gani adlaw o panahon sa pagsimba kasagaran gamiton pa alang sa kaugalingon apan hangtud karon wala man gihapon madato ni moarang-arang ang kinabuhi.
Akong balikon ang akong gisulti sa ubang kapilya sa ubang kapilya nga ang kaluwasan wala gitanyag sa bulangan, diskohan, sa sugalan ug uban pang matang sa bisyo kay ang kaluwasan gitanyag lamang sulod sa simbahan ug sa mga sakramento niini, kay sama gud na kon mopalit ka ug pan adto jud ka mopalit sa panadero, bakery o tindahan kay way baligya niana sa hardware, sa hospital o punerarya.
Hinoon wala man sad na magpasabot nga mga buluhaton sa simbahan mao lamay makapalangit kanato kay dili man sad kaseguruhan nga tungod kay nag-alagad kamo sa simbahan nga segurado na ang inyong kaluwasan. Pero mao nay dakong pangutana kon kining taga simbahan maglisod man gani sa kaseguruhan sa ilang kaluwasan, samot na jud ning talagsa ra nato makita sa simbahan.
Sa katapusan, mao niy giingon sa atong panultihon, walay balibaray ug wala say pugsanay. Kini mao ang tanyag sa Ginoo alang kanato karong adlawa it’s either magpabilin kamo kanako aron makapamunga kamo ug daghan or ang dili magpabilin mahisama sa usa ka sanga nga ibalibag ug Malaya, pamuniton kini ug dauban!
Wala man tuod niy balibaray ug way pinugsanay pero mao na ang lintunganay sa atong pagapilion kay bisan ganing kadtong mga sanga nga nagpabilin sa punoan matud ni Jesus kinahanglan paman pul-ungan aron mamunga.
Dili unta kita makatugot nga sama sa usa ka piso sa agila mamatay nalang nga dili gani masayod sa iyang tinuod nga pagkasiya…sama sa akong giingon kita sa sinugdan iya gayod sa Amahan busa maningkamot usab kita nga magpabilin kanunay diha sa presensiya sa Amahan. Ang pangutana kon andam naba kita sa pagpamul-ong sa Ginoo?

ALANG SA MGA KAABAG

Ang panultihon ni Jesus nagkanayon, si kinsa kadtong magpataas sa iyang kaugalingon ipaubos apan kadtong magpaubos sa iyang kaugalingon diha sa pag-alagad ipataas.
Sa laing bahin usab sa atong kontexto karong mga panahuna atong nasinati usab nga ang nagpaubos sa iyang kaugalingon nahimo gayod nga ulipon tungod kay basta gani mahimo na sila nga leader sa atong katilingban sila naman usab ang gisaligan nato sa tanan ug ang molihok sa tanan, gawas nga nahimo na silang ulipon nahulog nalang pod hinoon nga pangdaug-daug ang atong gibuhat alang kanila.
Sa akong kasinatian lang, human sa misa kasagaran nga paampuon kon dunay kasal o dili ba kaha bunyag ug bisan unsang okasyon ang pari maoy paampuon nga mura ug pari lang ang makamaong mag-ampo ug tingali mao usab kini ang nahitabo sa mga lumilihok sa kapilya nga ang kasagarang naglihok kadto lang usab ang may katungdanan hinungdan nga gamay na lang o wala na gani’y mobolontaryo nga mag-alagad kay panahon nga magpili na ug mga tawo alang sa maong katungdanan daghan ang mobalibad kay wa lagi’y panahon ug busy sa panginabuhian kay unsaon nga gawas niana makita man usab nga walay suporta ang katilingban.
Busa una sa tanan, atong pasalamatan kining atong mga igsoon nga bisan paman tuod kon taliwala sa kalisod sa pag-umol ug tawo labaw sa tanan diha sa pagdumala kanila ilabina diha sa mga buluhaton sa simbahan gitahan nila ang ilang kaugalingon. Busa hangyoon ko usab kamo, kamo nga sakop niining maong katilingban sa pagsuporta kanila sa tanang aspeto dili lamang sa moral kon dili apil na usab niini sa pinansyal. Angay natong hinumduman nga sa ilang pagtahan sa ilang kaugalingon gihimo nila kini sa walay pagpangayo ug bayad, sa walay pagpanuko nga mobiya sa ilang pamilya bisan pa man kon ang ilang pagaadtuan daw walay kasegurohan tungod kay mga meeting ug seminar nga ilang tambungan wala man sila hatagi ug kwarta didto kon dili mga pagtulon-an busa dasigon unta ninyo sila pinaagi sa inyong pagtabang kanila, sa pagpaminaw kanila diha sa ilang mga hangyo ug mga mensahe.
Sa katapusan, tinuod nga diha sa ilang kinabuhi dili man usab sila hingpit kay daghan usab sila ug mga kakulangon isip tawo hinaot unta nga inyong masabtan ang tanan as long as ang ilang gibuhat tolerable dili illegal ug immoral. Angay ninyong hinumduman nga wala man magpili ang Ginoo ug mga anghel aron maoy iyang mahimong pari o kaabag, wala niya pilia sila nga mga angayan apan gihimo niyang angayan kadtong iyang gipili aron nga pinaagi sa kinabuhi niining mga tawo nga giisip nato nga dili angayan, ikapadayag ang iyang himaya.
Alang usab sa mga kaabag, dili kini usa ka passes alang kaninyo nga tungod kay may pagsabot ang mga tawo kaninyo magpatuyang nalang usab kamo labaw sa tanan magpasagad ba hinoon sa inyong katungdanan, angay hinumduman nga kamo igo lamang nga miambit niining maong buluhaton busa paningkamot usab kamo nga dili kaulawan ang nagpadala kaninyo nga mao ang Ginoo.
Labaw sa tanan sunda ninyo ang panig-ingnan ni Kristo nga mianhi siya sa kalibutan dili aron alagaran kon dili aron sa pag-alagad kay ang ilhong dako sa atubangan sa Dios dili man kadtong gialagaran kon dili ang nag-alagad...
Hinaot pa unta...

THE EMPTY TOMB

Kung nakapaminaw mo sa pasyon nga gibasa niadtong Byernes Santo masayran ninyo nga gipahiluna nila ni Jose nga taga Arimatea ug ni Nicodemo si Jesus sa usa ka lubnganan nga wala pa kalubngi. May mga pamalandong nga nag-ingon nga bisan tuod kon si Jesus maoy tag-iya sa tanan by virtue of His being isip anak sa Amahan apan bisan pa niana wala siyay luna nga iyaha gani gilubong siya sa lubnganan nga dili iya.
Tungod niini nagkinahanglan gayod nga mabanhaw siya kay sumala pa sa mga pasiaw bawion na daw sa tag-iya ang gilubngan kaniya. Ingon niana jud kakabus ang atong Ginoo. But for what ever reason, alang kanato nga nagtoo kaniya hugot usab ang atong pagtoo nga nabanhaw siya dili tungod kay dili siya maoy tag-iya sa gilubngan kaniya kon dili tungod kay kini maoy pagbuot sa iyang Amahan sumala usab sa gipadayag sa transfiguration scene aron nga pinaagi sa iyang pagkabanhaw ang tanan makabaton usab sa samang paglaom nga ang tanang nangamatay diha sa pagtoo ug pinasubay usab sa mga sakramento sa simbahan sama kang Kristo mabuhi pag-usab ngadto sa usa ka kinabuhi nga wala nay katapusan.
Hinaot nga padayon unta kitang maghupot ning maong paglaom hangtud nga moabot na usab kita sa gisaad nga pagkabanhaw uban sa atong Ginoo.

THE END DOES NOT JUSTIFY THE MEANS

Sa dihang gisekrito unta sa pagtabang nila ni Santino ang inahan ni Rico nga nadigrasya sa teleserye nga may bukas pa, nasuko si Fr. Jose sa bata tungod sa pagkat-on niini sa pagpamakak. Matud pa ni Santino nga iyang gibuhat nga paglilong kang Fr. Jose aron pagtabang unta, nahimong usa ka sayop...apan alang kang Santino di pa siya makasabot nganong sayop ang iyang gihimo tungod kay kanus-a man diay mahimong sayop ang pagtabang? Dili man tingali sayop dili ba? Sa inyo kahang huna-huna?
Maanindot kaayo ang pagpasabot ni Bro kang Santino nga dili usab maayo nga motabang ka sa tawo sa dautang paagi. Kung baga sa English this is what they call that the end does not justify the means. Buot ipasabot nga dili tungod kay nakatabang sa tawo ok na lang bisan kung ang imong gihimo dautan sama pananglitan sa gihimo ni Robinhood nga nanulis siya sa mga dato ug ang iyang gitulis iya usab nga gitabang sa mga kabus. Dili man sayop ang pagtabang, apan dili pod unta kita maghimo ug laing sayop aron ilhon nga husto ang atong gihimo nga pagtabang.
Kini mao ang nahitabo karon sa ebanghelyo nga tungod sa ilang paningkamot nga katabunan ang ilang mga sala sa ilang kaugalingon, ang mga pariseo naningkamot gayod unsaon pagpildi kang Jesus pinaagi sa pagpangita ug sayop sa iyang gihimo aron ilang ikapasangil.
Sumala pa sa pagbasa nga pinaagi ni Caifas ang pangulong pari kaniadto nagkasabot sila nga patyon si Jesus kay maayo pa nga isakripisyo ang usa ka kinabuhi aron pagluwas sa daghan. Apan ang wala hinoon nila masayri nga pinaagi hinoon sa kamatayon sa usa nga naluwas ang daghan. Sama sa nahitabo sa kinabuhi ni Ninoy nga tungod sa iyang kamatayon mao hinooy nakapahigmata sa mga Pilipino aron maghugpong ug himoon makasaysayang hitabo sa tibuok kalibutan nga mao ang people’s power.
Mga igsoon hapit na usab ang election, ang akong pahinumdom mao nga dili unta nato gamiton nga rason ang atong kalisod sa kinabuhi aron modawat ug ibaligya ninyo ang inyong buto tungod sa bisan unsang hinungdan. Kini unta maoy maghatag kanato ug igo nga higayon aron paghatag ug dignidad sa atong mga buto, paghatag ug dignidad sa atong pagkatawo labaw sa tanan aron sa paghatag ug maayong ihemplo ngadto sa inyong mga anak. For again, the end does not justify the means.
Tinuod dili man nato masinati ang hingpit nga kausaban sa pagkakaron pero at least kung moabot ang panahon nga mangutana ang inyong mga anak kung unsay inyong gihimo panahon sa election you can honestly claim nga mibutar ko sumala sa akong konsensiya ug dili sumala sa gidak-on sa kwarta! Aron dili pod ta unya kapaninglan sa mga ulahing henerasyon for not showing them a good example to follow.
Kon tinuod gayod nga kita mga gawasnon diha sa pagpili mahimo pod unta kitang gawasnon sa pagdawat sa sangputan sa maong desisyon. Padayon unta kitang mag-ampo alang sa dugang lamdag sa pagpili ug paghimo ug desisyon pinaagi sa tabang sa atong Patron San Vicente Ferrer aron sama kaniya makahimo usab kita sa pagbuhat sa kabubut-on sa atong langitnong Amahan.
Hinaot pa unta…

JACKPOT PRIZE

Usa ka karaan nga pasiaw nga akong nadungog naghisgot bahin sa kaihimtang diin nakadaog sa lotto ang usa ka tigulang sa jackpot prize balor ug ug 350 million. Nagproblema na karon ang mga anak unsaon nila sa pag-estorya ang ilang amahan kay basin unya tungod sa tumang kalipay ug atakihon unya sa sakit sa kasingkasing ug mamatay.
Busa nagpakitabang sila sa pari kung unsaon. Ug tuod man, sa didto na sila sa pari, ang pari miingon nga siya na ang bahala sa pag-estorya sa ilang amahan sa maong balita. Sa didto na ang pari sa balay sa maong tigulang miingon siya, tay kining unsa may imong buhaton kung pananglit lang ha nga nakadaog ka sa lotto ug mga 50 thousand, unsa may imong buhaton?
Ang tigulang pasimply lang pod ug miingon kung nakadaog ko nianang kantidad padri ang akong buhaton mao jud ang pagpasalamat sa Ginoo ug agi’g pagpasalamat akong ihatag sa simbahan ang 25%. Miingon na usab ang pari, pananglit kung midaog ka ug mga 150 milyon unsa may imong buhaton? Medyo midako-dako na ang kantidad nga iyang gibungat. Apan mao gihapon ang gitubag sa tigulang. Busa misulti na jud ang pari sa tiunod nga kantidad nga gidag-an sa tigulang ug ning higayuna medyo nausab ang huna-huna sa tigulang ug miingon, pananglit ug makadaog ko ug 350 milyon padre akong ihatag ang katunga sa akong daog sa simbahan. Na shock ang pari ug tungod niini diya hinoon ang gitabang kay siya naman ang nakuyapan!
Mga igsoon, ang pagkabanhaw sa atong Ginoo gikan sa kamatayon ngadto sa kinabuhi labaw pa kay sa nakadaog ka ug 350 milyon sa lotto. Ug tingali alang sa mga tinun-an maglisod sila pagsabot sa kahulugan sa pagkabanhaw apan mitoo sila tungod kay mao may ilang nakita.
Sikat kaayong kining panultihon nga nagkanayon “To see is to believe.” Or at least, motuo ka ug modawat kung makakita ka di ba? Apan ang pangutana tinuod ba gud na? Well, ang mga philosophers moingon nga dili kana tinuod or sayop ang maong panultihon. Kung makakita ka giingon nga nasayod ka. Dili ba kung nasayod ka ang imong isulti “Now I see.” Buot ipasabot nga mitoo ka karon tungod kay nasayod ka dili pinasikad sa unsay gisulti sa uban kon dili tungod sa imong nakita. Busa ang husto unta nga isulti “To see is to know.”
Apan sa ebanghelyo karon nga atong nadungog kining tulo ka mga tinun-an nga nangadto sa lubnganan, sila si Maria Magdalena, si Pedro, ug Juan giingon nga nakakita sila ug mitoo. Kung kini ang atong gamiton nga pruweba murag husto tuod ang giingon “To see is to believe” apan ang tubag nga dili gihapon husto tungod kay ang gituohan ni Juan dili man ang iyang nakita.
Ang nakita ni Juan nga wala didto si Jesus sa lubanganan apan nagtuo siya sa presensiya sa Ginoo. Nakita niya ang walay sulod nga lubnganan apan mitoo siya sa kinatibuk-an sa pagkabanhaw.
Sa higayon nga iyang nakita ang puting panapton nga tua didto nabilin sa lubnganan, si Juan wala magtan-aw sa patay nga Kristo apan nagtoo siya sa nabanhaw’ng Ginoo. Nagtoo siya sa wala niya makita.
Kini usab ang hagit alang kanato karong adlawa nga bisan tuod kon wala na nato makit-i si Jesus nga naglakaw sa atong taliwala nagtoo kita kaniya. Nagtoo kita sa usa ka Dios nga nagpakatawo, mipuyo uban kanato, namatay sa krus ug nabanhaw ngadto sa kinabuhing walay katapusan.

AT HOME

Dunay usa ka piriko kana bitaw’ng langgam nga makahibalo mosulti ang nakaapan lang kay hinawayon kaayo. Usa niana ka adlaw sa dihang milabay ang ilang silingan nga babaye… natingala siya kay adunay nanitsit…pssst…usa ka langgam nga piriko ug sa dihang nangutana siya nganong nanawag siya, ang langgam miingon pangit…pangit.
Sa sinugdanan wala lang niya baliha ang estorya sa langgam apan sa kadugayan iyang giestoryahan ang tag-iya bahin sa kinaiya sa iyang langgam aron madisiplina. Tuod man sulod sa tulo ka bulan wala na makita ang langgam sa iyang silingan apan usa ka buntag niana sa iya napod nga paglabay sa iyang silingan iya napod nadungog ang sitsit sa langgam….pssst, psst. Ngano naman sad, nangutana siya? Ang langgam mitubag well kabalo naka…
Ang pagbasa karong adlawa ilabina sa ebangehelyo kon nakabantay mo pareha sa kagahapon ug nakahuna-huna ko nga di nalang ko magwali total nadungog naman ninyo ang akong pamalandong kagahapon…nakabalo na bitaw mo…
Sa dihang giandam sa Dios ang mahal nga birhen Maria nga mahimong pinuy-anan sa iyang anak I’m sure nga gihimo kini sa Dios aron mahimong at home ang iyang anak dinhi sa kalibutan…kay kana bitaw panahon nga adunay mamisita sa atong panimalay moingon man ta please feel at home, pakasusamaha nga imong ning balay tungod kay sa atong pagsulti sa ingon gusto nato nga mahimong gawasnon ang atong mga bisita…ug ang mahal nga birhen Maria nahimo siyang matuod nga pinuy-anan sa anak sa Dios tungod kay na at home ang Ginoo kaniya.
Nahimong gawasnon ang Dios sa iyang kinabuhi tungod sa iyang pagsanong ug paghatag sa iyang kaugalingon ngadto sa plano sa Dios, pinaagi sa iyang mapaubsanong pagsugot sulugoon ako sa Ginoo mahitabo unta kanako ang imong gisulti.
Ang Ginoo bitaw bisan sa iyang pagkagamhanan wala jud maglapas sa atong tawhanong katungod nga bisan pa kon mahimo niya ang tanan apan bisan kanus-a wala jud siya molapas niini. Nga bisan ug unsaon niya nga madani ang tawo ngadto kaniya apan kon dili ug mobalibad gayod ang tawo, wa siya’y laing mahimo gawas sa pagtamod sa desisyon sa tawo.
Busa ang atong paningkamutan sa pagkat-on mao unta ang kinaiya nga gipakita sa mahal nga birhen Maria nga kanunay untang bukas ang atong kasing-kasing sa Ginoo nga ma ta home unta ang Ginoo sa atong pagkatawo labaw sa tanan kita pod unta nga mahimong at home ngadto sa Ginoo.
Ikaduha nga punto nga akong nakita, sa proseso sa ilang panag-estroyahay tali sa Mahal nga birhen ug sa anghel sa Ginoo, wala jud siya lung-i sa anghel hangtod nga mitando si Maria ug bisan pa ug wala kaayo makasabot si Maria mitando siya, matuman unta kanako ang imong gipamulong ug diha pa mibiya ang anghel kaniya...
Sa akong pamalandong, ang tawag sa Ginoo consistent jud ug dili mabalhinon ug dili mag-usab2x ug labaw sa tanan persistent pod nga ang iyang pagtawag makanunayon ug magpabilin hangtud nga kanus-a ta mahimong gawasnon sa iyang tawag alang kanato.
Tan-awa ang kinabuhi ni Propeta Jonas nga bisan giunsa niya sa pagbalibad sa Ginoo ug pagpahilayo kaniya apan tungod kay gitawag siya sa Ginoo, ang Ginoo mangita gayod ug paagi. Hinungdan nga nagtoo ako nga kon ang Ginoo na gani ang motawag dili gayod siya mohunong hangtud nga dili ka mosanong…ug para nako dili pod unta ta magdinalo sa atong kaugalingon ngadto sa Dios kay ug ayha pa ta moalagad sa Ginoo ug magsungkod na ta unsa may kalainan niana karon nga himsog pa ta? Kon makahimo ka pagtando sa umaabot nganong dili man karon? Di ba dapat ang atong ihatag balik sa Dios kadto mang pinaka da best?
Sa dihang gisukna nako ang akong uyab kaniadto kanus-a man ko nimo sugton? Miingon siya ugma nalang…busa ako siyang gipangutana unsa may kalainan ana karon ug sa ugma? Kon makahimo ka ug desisyon karon, I mean kon sugton ko nimo ugma or i-basted kaya nganong dili man karon? May gani kay nadala ra labi na kay ako siyang gikantahan ug malayo pa ang umaga hehe…
Practically wala may kalainan niana apan gusto lang ta nga magpaabot ang uban…ug sa makausa pa mobagting na sad sa akong panumduman ang panultihon ni kanhi Presdenti Mañuel Roxas nga nagkanayon, “Huwag mong ipagbukas pa ang magagawa mo ngayon”. Ato na untang ihiklin ang Mañana habit tungod kay karon na ang panahon kay lisod ug mahutdan na ta ug ugma kay nila pa bitaw maayo pa man kuno ning manok ug mamatay kon ihawon kay kaunon pa sa tawo apan kon ang tawo nay mamatay kaunon ra intawon sa wati…hinaot pa unta nga mahimong magmabungahon ug magmabulukon ang atong pagpuyo sa atong kinabuhi dinhi sa kalibutan…

WALA MASIPYAT ANG GINOO

Niining taas nga talaan sa kagikan ni Jesus buot lamang ipakita kanato sa mga manunulat kining mosunod nga mga punto.
1. Una, Si Jesus mao gayod ang gisaad nga katumanan sa mga panagna sa mga propeta nga moabot aron magsilbing kahayag alang kanato, aron pagdala ug bag-ong paglaom taliwala sa atong daw dili na masabot nga kahimtang karon, aron sa paghatag kanato ug igong kadasig nga makapadayon kita sa pagpaningkamot sa pagpakabuhi nga matarong, maampuon, ug maalagaron ngadto sa uban bisan paman kon usahay kawad-an na kita ug inspirasyon sa pagbuhat niini.
2. Ikaduha, nga sa kataas sa panahon ug gani mikabat na ug 80 ka henerasyon ang milabay sukad mugnaa sa Dios ang kalibutan ug ang tawo apan ang pagpakatawo sa iyang bugtong anak maoy kamatuoran nga bisan kanus-a wala hikalimti sa Dios ang iyang gisaad ug hangtud karon, ang Dios padayon gihapon nga mopatuman sa iyang saad sa pagdala balik ngadto kaniya sa tanang mga tawo ug sa tibuok kabuhatan sigon sa iyang plano ug sa pag-abot sa takdang panahon.
3. Ikatulo, nga wala masipyat ang Dios sa iyang plano sa pagpadala sa iyang anak two thousand years ago aron nga mopuyo, mosinati ug makig-uban kanato sama sa usa ka tawo bisan paman sa iyang pagka Dios. Ug kana tungod kay ang plano sa Ginoo kanunay man gayod nga on time and always in the right time
4. Ikaupat ug katapusan, nga wala usab masipyat ang Ginoo sa iyang desisyon ug sa iyang plano nga matawo kita sa panahon nga iyang gitagal, matawo sa atong mga ginikanan mosinati sa ilang pag-amuma ug pagmahal luyo paman sa ilang tawhanong kakulangon, apan gipili sila sa Dios aron nga pinaagi kanila mabuhi kita sa kalibutan. Wala masipyat ang Dios sa pagpili kanato aron maiya ug mahimong sakop sa simbahan luyo paman sa atong kakulangon, ug bisan paman sa atong pagkamakasasala. Gipili kita sa Dios dili tungod sa atong mga katakos kon dili tungod kay nasayod siya nga pinaagi sa atong pagkakita, He can bring out the best in us. Nagkinahanglan lamang kita mga igsoon nga mamalandong kon unsa kaha ang ipasabot kanato niining tanan, unsa kaha ang kabubut-on sa Dios alang kanato ug unsa man usab ang atong mabuhat alang sa buluhaton sa Dios ug sa iyang plano kanato…
Sa katapusan, bisan paman tuod kon madugay-dugayan ang pag-abot sa gisaad sa Dios mahuptan ta unta ang paglaom ug ang kadasig nga sa madugay man o madali tumanon gayod sa Dios ang iyang gisaad…

AWIT SA PAGDAYEG

AWIT SA PAGDAYEG
Si Alex ug Gibson suod nga managhigala ug nagksabot sila nga usa niana ka gabii nga mamisita sa ilang silingan nga si Joan. Apan sa wala pa sila mogikan gi-briefing daan ni Alex si Gibson nga kon unsa gani ang isulti ni Alex ngadto kang Joan kinahanglan nga palabwan jud kanunay ni Gibson aron nga mobilib jud ug ayo si Joan. Ug tuod man sa didto na sila miingon si Alex, Jo pasensiya na ha nga tulo ra jud ka buok bulak ang akong nadala unsaon man gud naapekhan ko, ug si Gibson miingon ayaw tuo ana Jo kay ang tinuod ana tag-iya na siya ug flower shop. Wow ang galing di ra kaayo siya halata!
Unya gitunol napod ni Alex ang tulo ka buok chocolate dungan sa pag-ingon, pasensiya na jud Jo, kay tulo ra jud ka buok ang akong napalit ug espesyal jud na para sa imo…ayaw’g tuo ana Jo matud ni Gibson kay ang tinuod ana ang iyang amahan stock holder sa tobleron sa Manila.
Gihatag napod dayon ni Alex kang Joan ang tulo ka botelya sa redwine ug miingon pasensiya na jud Jo kay tulo ra jud ning akong nadala unsaon man gud nagdali-dali ko…ug palo-up napod si Gibson, ayaw’g tuo ana Jo kay ang tinuod ana duna silay farm sa seedless grapes didto sa Baguio.
Dayong igham si Alex ug miingon, pasensiya na Jo medyo giubo ko…palo-up napod si Gibson ayaw’g tuo ana Jo TV jud na Jo TV kay iyang lola namatay adtong usang semana…hehe bulabog!
Mga igsoon, bisan kinsa kanato mangandoy gayod nga mahimong sikat ug inila sa atong katilingban. Kini mogawas kasagaran sa panahon nga motan-aw ta sa TV naa sulod sa atong kahiladman makaingon ta sus maayo unta kon mapareha sad ta nila nga mga artista hinahangaan ang galing…sayod ko nga ang matag –usa kanato dinhi adunay kanya-kanya nga mga idol o artista nga atong ganahan. Ang amo lang inahan bisan sa iyang pangidaron dili jud niya sipyaton ang pagtan-aw sa salida ni Fernando Poe Jr tungod kay iyang idol. Ug maoy akong pagtoo nga usahay mangandoy sad ta nga mahisama kanila.
Sa laing bahin, kon hatagan ug kahigayunan nga mahimong sikat ug adunahan ang uban makalimot usab sa ilang mga kaigsuonan nga kaniadto ilang nakauban.
Sa didto bitaw ko sa Gensan atol sa victory party ni Manny Pacquio, ang mga tawo sa akong tapad miingon, sus class na jud kaayo ang mama ni Manny, karon duna na siya’y daghang sulugoon. Bisan asa siya dunay tsaperon ug taod2x lang gasige ug spray sa iyang pefume…labon sa una…
I guess kini ang kulang sa ato usahay, ang kakulang nato sa pagbalik-lantaw sa kung kinsa kita kaniadto...ang mahal nga birhen Maria human niya gidawat nga mahimong inahan sa anak sa Dios nagpabilin sa gihapon sa iyang kayano ug kamaalagaron gani sumala sa atong nadungog mibaktas siya ug layo aron pagduaw kang Isabel nga iyang ig-agaw nga niining higayuna unom ka bulan nga nagsabak aron pagsilbi kaniya.
Di ba dapat nga si Maria ang angay nga silbihan by virtue sa iyang pagka inahan sa anak sa Dios apan wala kana niya gihimo ug ang iyang pagkamapaubsanon nadayag diha sa iyang awit…miingon si Maria “Nagdayeg ang akong kasingkasing sa Ginoo ug nagmalipayon ang akong kalag tungod sa Dios nga akong Manluluwas tungod kay nahinumdom siya kanako nga iyang ubos nga sulugoon.
Gipukan niya ang mga hari nga gamhanan gikan sa ilang trono ug gituboy ang mga mapaubsanon, gibusog niya ang ug mga maayong butang ang mga gigutom ug iyang gipapahawa nga walay dala ang mga dato…
Kung ang tanan makakat-on gikan sa panig-ingnan sa atong langitnong inahan tingali dili ta maglisod sa pagtuman sa kabubut-on sa iyang anak mianhi sa kalibutan dili aron alagaran kon dili aron sa pag-alagad sa tanan…atong hinumduman nga ang ilhong dako sa atubangan sa Dios dili ang gialagaran kon kadtong nag-alagad…busa mag-ampo kita, palihog manindog…
“LORD MAKE ME A SERVANT, HUMBLE AND MEEK. LORD LET ME LIFT UP THOSE WHO ARE WEAK AND MAY THE PRAYER OF MY HEART ALWAYS BE, MAKE ME SERVANT TODAY…Amen!

ANG TEMPLO SA GINOO

Nakahinumdom ko usa niana ka higayon sa dihang gibadlong ko ang mga tawo sulod sa simbahan tungod kay saba kaayo samtang nagpakompisal ko. Dunay mga bata nga naghilak, mga silingan nga nagtabi, kusog nga katawa o bahakhak, dunay iro nga gapaso-paso ug mag-away pa usahay, samtang ang uban nag-ampo sa rosaryo ug novenahan ug ang uban nagpraktis ug kanta…
Kini alang kanako maoy moderno nga bersiyon sa gibasa nga ebangehelyo karon nga daw gihimo nato nga merkado ang balay sa Ginoo. Usahay mao gayod kini ang tentasyon nga usahay ang simbahan mahimong extension sa inyong mga balay hinungdan usab nga ang uban kanato dili kahibalo magbihis alang sa simbahan. Mao na usahay nga kinahanglan pa nga pahinumduman ug butangan pa ug mga billboard unsay angay suoton panahon sa pagsimba.
Mga babaye usahay nga naka spagite, tubeless, backless, heaven2x nga makita ang pusod, usahay taas kuno ang saya pero ang taas pod ang gisi. Mga lalake nga naka short lang ug suot pa ang kalo, mga kamot nga walay limpyo usahay makita pa nako ang numero sa swertres nga gisulat sa palad…ano bayan so kadiri! Dirty kaayo…
Imagina gud ninyo kon kamo ang naa sa kahimtang ni Jesus kon makita ninyo nga ang dapit nga giisip nato nga balaan tungod kay mao ang pinuy-anan sa Ginoo tua didto makita ang mga tawo nga namaligya ug mga baka, mga karnero ug mga salampati. Plus idugang pa jud nato ang mga mangingilis ug kwarta, kinsa may malipay niini? Busa angay lang nga gipanglimbuwad ni Jesus ang ilang mga lamesa ug giabog sila pinaagi sa bunal.
Ang pangutana ngano man nga dunay ingon niini? Kaniadto ang mga tawo nga moadto sa Jerusalem aron sa pag-ampo ug aron mas kompleto ang ilang pag-ampo mopalit sila ug mga mananap aron sunugon kay mao man ang gitudlo sa mga Pariseo nga ang ilang mga sala nga nabuhat mapapas o mahanaw kon maghalad sila ug mananap nga sunugon.
Syempre kadtong mga dato kay makaaford man mopalit sila ug baka o di ba kaha karnero ug kon pobre jud ang salampati na lang ang ilang paliton aron ihalad. Nganong duna man say mga mangingilis ug kwarta? Tungod kay ang mga kwarta nga gigamit sa mga tawo hinimo man sa mga taga Roma nga ang buot ipasabot iya sa mga langyaw hinungdan nga wala nila kini gidawat. Ang kwarta nga ilang gidawat sa Templo mao ra gayod ang kwarta nga ilang hinimo hinungdan nga dunay money changer.
Busa gubot jud kaayo kay may mga panahon usab nga maglalis sila kay barato ra usab ang bili o currency sa ilang kwarta plus idugang pa nato ang kasaba sa mga baka, karnero ug salampati kon magdungan ug tingog gubot pa sa lukot!
Ang labing importante nga punto ug lawom nga kahulugan sa ebanghelyo mao ang pag-atiman nato sa templo sa Ginoo...ug nga ang templo sa Ginoo dili lamang kining building kon dili ang atong lawas mismo. Kini mao ang buhing templo sa Ginoo apan kasagaran kining atong lawas nga templo sa Ginoo paslakan nato ug daghang mga dautang elemento.
Matud pa sa pari ang tawo templo sa Ginoo unya kay gilamok ang templo mao nang magpaaso ang tawo. Kadaghanan manigarilyo, kusog nga moinom, mihingos pa usahay ug shabu, usahay pagamaygamayan pa ang templo labi na sa mga babaye kay maningkamot nga maniwang mag-inom ug fitrum ug uban pang mga slimming pills.
Apan ang lawom pa niana nga pag-abuso nato sa templo, sa atong lawas gawas sa nagkadaiyang bisyo naa sad ang atong mga tawhanong pagbati sa kasuko ug pagdumot, naa ang kailibgon sa lawas...kini ba ang atong paagi sa pag-atiman sa templo sa Ginoo?
Mga igsoon, sa akong pamalandong angay na usab ug panahon na gayod nga atong dapiton ang Ginoo aron hinloan niya ang atong pagkatawo og kon dili pa gani paigo hinaot unta nga maghimo ang Ginoo ug latigo aron mahinloan ta sa atong pagpakaarong-ingnon... labaw sa tanan human kahinloi unya kita sa Ginoo mag-ampo usab kita nga pulihan niya ug bag-o, mga maayong butang nga makaayo dili lamang sa atong lawas kon dili apil na atong Espiritu...kay makaako gani ta sa paghilo sa atong kaugalingon maantigo usab kitang moalima niini...
Sa katapusan, sama sa gihisgutan sa salmo 84 verse 10...palabihon unta nato ang pagpuyo sa balay sa Ginoo kay ang usa ka adlaw sa iyang templo mas maayo pa kay sa usa ka libo ka adlaw didto sa laing dapit...hinaot unta nga niining maong templo sa Ginoo makakaplag kita ug pahulayan...

ANG SAKSI SA KAHAYAG

Usa ka higayon niana nag-abot si Goliat ug Teban ug nakahisgot sila bahin sa mahal kaayo nga bill sa kuryente. Biliba jud nako nimo noy miingon si goliath kay tiaw mo na sa kadako sa imong balay gamay rang kuryente ang imong nabayran, nanikas ka no? Wa man tubag pa ni Teban, ako lang gigamit ang akong utok…kay magpasiga lang ko sa suga kon mangita nako sa posporo…bantog ra nga gamay rag gasto hehe.
Ning panahon karon bisan tuod kon mahal ang kuryente pero di bali na maggasto ta ug mahal basta magpuyo lang ta sa kahayag kay sa magdaginot ug mag-antos nga magpuyo sa kangitngit, Amen! Nila pa bitaw paminsan-minsan lang man na….
Sa ebanghelyo karong adlaw nga atong nadungog si Juan nga magbubunyag kansang papel mao ang pag-andam sa dalan sa Ginoo pinaagi sa pagbag-o sa kasing-kasing sa tawo diha sa iyang buhat sa pagpamunyag ug sa ilang pagbiya ug paghinulsol sa ilang mga sala, kining tanan gibuhat ni Juan aron pagsaksi ngadto sa mga tawo mahitungod sa kahayag, aron ang tanan makadungog ug motuo.
Si Juan dili mao ang kahayag, apan mianhi siya aron pagsaksi sa kahahayag nga way lain kon dili ang pag-abot ug ang pagkatawo sa anak sa Ginoo dinhi sa atong taliwala. Kini mao ang rason nganong kinahanglan kita nga magsadya tungod kay hapit na gayod ang pag-abot sa panahon kanus-a gipakatawo ang anak sa Ginoo.
Kini mao ang gitawag sa simbahan ug Gaudete Sunday nga gikan sa pulong Latin nga ang buot ipasabot pagsadya tungod haduol na siya. Kom baga sa akong estorya ang pagkatawo sa anak sa Dios mao ang kuryente nga maghatag ug kahayag sa atong kinabuhi ug nga unta mas palabihon nato ang paggamit sa kuryente nga maghatag kanato ug igong kahayag kay basin baya kon palabihon pa nato ang paggamit ug mga lamparilya kay magdaginot lagi.
Ang kahayag sa kuryente nga akong gihisgutan nga gikan ni Kristo nga atong naambitan mao man gayod ang atong pagkabinunyagan, ang atong pagka Kristiyanos ug ang atong pagkasakop sa simbahan. Mao bitaw nga miingon si Kristo kamo ang kahayag sa kalibutan ipadan-ag ang inyong kahayag atubangan sa mga tawo aron makita nila ang inyong mga maayong buhat ug magdayeg sila sa inyong Amahan nga atua sa langit.
Nga diha ug pinaagi sa atong mga maayong mga buhat nga mogilak kita sa kahayag ug makita sa uban ang anino sa Dios sa atong kinabuhi. And I guess kini mao ang pinakadako nga pagdayeg nga atong madawat sa atong kinabuhi kon may usa ka tawo nga moingon salamat kaayo brod or sis tungod kay nakita nako ug nahimamat si Kristo sa imong kinabuhi. Nga ang buot ipasabot nga nahimo kitang instrumento alang sa uban aron makaila sila ug Ginoo.
Sa akong pamalandong mga igsoon kining tanan nga mga suga, mga bombilya, xmas lights and decors bisan unsa pa na kahayag ug kadako sa wattage apan kon dili maka connect sa kuryente dili gihapon siya mosiga. Busa importante nga kanunay kitang nakakutay sa tinubdan sa kuryente aron nga magpabilin nga magsiga ang atong kahayag.
Importante nga magpabilin kita sa simbahan, nga molihok kita isip mga binunyagan ug manggilabot sa simbahan aron maampingan nga magsiga kanunay ang atong kahayag.
Sa katapusan, dunay daghan sa atong mga igsoon karon nga napunder na ug wa na magsiga, hinaot nga niining nagsingabot nga pasko magsilbi unta nga kahayag ngadto sa uban ang atong mga kinabuhi…

ANG PAMILYA KARON

Dunay usa ka tawong buktot nga naminyo ug sa dihang nakasal na sila ang iyang asawa nahimo usab nga buktot, ug ang lisod pa jud katuhuan tungod kay sa dihang nakaanak na sila pati ang ilang anak nahimo usab nga buktot…a! di na katuhuan oy matud Goliat kay tiaw mo na nga ang bana buktot, naminyo ug ang asawa usab nabuktot ug sa dihang nakaanak napod sila ang bata nahimo usab nga buktot, imposibli. Apan matud pa ni Teban nga posibli nga nangabuktot silang tanan tungod kay ang ilang apilido buktot man…
Mga igsoon kini mao ang atong balaod nga gisunod nga human sa pagkasal ang apilido sa lalake mao gayod ang dad-on nga apilido sa bag-ong pamilya mao nay hinungdan nga ang ubang ginikanan moingon nga mapuo ang ilang apilido kung pulos babaye ang ilang anak kay ingon niini man ang sistema nga atong gisunod.
Sa samang pagkaagi, ang paghalad sa batang Jesus ngadto sa templo nga gihimo ni Jose ug ni Maria maoy usa ka paagi sa pagtuman nila sa gisugo kanila sa balaod. Ang ilang gihimo maoy paghinumdom sa nahitabo kaniadto sa didto pa sila sa Ehipto sa dihang gisilotan sa Dios ang mga Ehiptohanon pinaagi sa pagpatay sa ilang mga kinamagulangang anak…
Busa ang balaod sa Ginoo nag-ingon nga ang tanang panganay’ng lalake kinahangalan nga ihalad ngadto sa Ginoo. Kon atong tan-awon pag-ayo ang ilang gihimo nga paghalad gihimo nila una, alang sa batang Jesus ug ang ikaduha alang kang Maria tungod kay nagtoo usab sila nga ang usa ka inahan human siya makapanganak hugaw siya not physically pero it is more on Spiritual matter nga mahimong mahugaw ang usa ka babaye sulod sa 40 ka adlaw kana kon ang iyang anak lalake apan kon ang iyang anak babaye mahugaw siya sulod sa 80 ka adlaw.
Unsa may naa niana alang kanato karon? Unang-una gitudloan kita sa Ginoo sa pagdala o paghalad ngadto kaniya sa tanan nga maayo ug dili lang kay maayo kon dili kadto gayong pinakamaayo ug sumala sa atong nadungog nga ang ilang gihalad mao ang batang Jesus ug wa nay lain pa nga molabaw pa ug bili kay kaniya kay siya na gayod ang pinaka dabest.
Kon nakahinumdom kamo, akong gihisgutan usab kini kaninyo nga ang angay nato nga ihalad balik sa Dios way lain kon dili ang tawo mismo tungod kay iya man siya sa Ginoo. Nan, “Ihatag nato ngadto sa Emperador ang iya sa Emperador ug sa Dios ang iya sa Dios”…
Nganong kinahanglan man nga ihalad ang bata? Kana tungod kay una sa tanan ang anak usa gayod ka gasa alang sa pamilya. Bisan unsa pa ka salawayon, ka bugoy, bisan unsa pa ka laksot ang usa ka bata siya gasa gayod alang sa pamilya.
Angay lamang usab nga hinumduman nga dili tanang nga nagminyo dunay anak gani kini pa usahay ang mahimong hinungdan sa lalis sa managtiayon tungod sa panginahanglan sa usa ka anak busa angay lamang nga tagaan ninyo ug bili ang inyong mga anak…kon gihatag sila sa Dios kaninyo kana tungod kay sayod siya nga pinaagi kaninyo motubo ug molambo ang bata sa paagi nga haom ug angay gayod kaniya.
Busa kini mao ang dayag kaayo nga kalainan kon manganak ang babaye sulod sa kontexto sa kaminyoon tungod kay malipay siya ug ang tibuok nga banay. Apan kon manganak ang babaye outside in the context of marriage makita nato nga grabe ang tensiyon ug ang kabalaka kay naa ang kahadalok sa ginikanan ug kaulaw sa katilingban…busa imbis nga mahimo nga gasa ang usa ka bata mahimo hinoon siyang disgrasya ngadto sa inahan ug sa iyang amahan. Ug kana usab ang nag-unang rason nganong wala nato gi promote ang pre-marital sex dili libre ha kon dili ang pakighilawas sa lalake ug babaye gawas sa kontexto sa kaminyoon kon dili ang pagpalig-on gayod sa kaminyoon.
Ikaduha ug katapusang punto mao nga ang ilang gihimo nga paghalad dili lang tungod kay maoy sugo sa ilang balaod kon dili labaw sa tanan nakita nato nga ang maong paghalad usa ka paagi sa pagsimba, ug labaw sa tanan sa pagpasalamat. Busa alang usab kanato ang atong paghalad dili lang tungod kay maoy gisugo kanato kon dili tungod kay kini usa man ka paagi aron kita mamahimong manggihatagon, ug mapasalamaton…
Usa ka higayon niana seminarista pa ko kaniadto nga nag-expose sa parokya sa Imelda. Usa sa mga misa ni Fr. Bags panahon sa paghalad nakita nako ang usa ka tigulang nga lalake nga nag-alsa sa usa ka bulig nga saging...dili lang basta saging kon dili kadto gayod pina nindot ug sa akong huna-huna kadto mao ang iyang unang harvest sa maong saging kay maila man hitsura kay dagko ug bus-ok kaayo ang bunga...natandog kaayo ko sa gihimo sa tigulang tungod kay ang iyang paghalad kinasing-kasing gayod nga walay kapin o kulang.
Bisan gipaningot siya apan ang maong larawan hulagway gayod sa usa ka sulondon nga paagi sa paghalad. Nabati nako nga wala siya magsapayan sa paghalad sa iyang unang abot tungod kay gihatag kini niya alang sa simbahan, for the Lord...para sa Ginoo! Didto ko nakakuha ug ideya nga ang tawo dili lamang makahalad ug salapi kon dili bisan gani ang bisan unsa nga inyong magamit sa inyo mahimong ikagasa sa simbahan.
Sa dihang naghatag ug valentine’s party ang Sierra Club sa mga seminarista nanghatag pod sila ug mga regalo apan ang ubang mga seminarista nakadawat intawon ug mga expired na chocolate, mga ginamit o biya na nga t-shirt...mao nang nakaingon ko nga lahi ra jud ang mga dato kon maghalad kay naghatag sila gikan sa naghingapin nila nga grasya. Pero ang mga kabus ang maghalad pilion jud kadtong pina ka dabest, tinibuok jud ug way kapin o kulang...kon saging usa ka bulig saging, usa ka buok nga dako kaayong kalabasa.
Ang akong panghinaot mga igsoon nga ang atong paghalad ngadto sa Dios sama unta sa gibuhat sa sagrada pamilya, mahisama unta sa gibuhat sa tigulang, nga magbuhat kita sa ingon dili lang kay maoy gisugo sa balaod kon dili labaw sa tanan tungod kay maoy atong nag-unang responsibilidad ang pagpasalamat sa Dios...hinaot nga sama sa batang Jesus motubo usab kita sa kaalam, sa pagkamanggihatagon ug pagkamapasalamaton...

ANG PAGTUBAG

Kung akong balikan ang nahitabo sa atong kapistahan sa parokya ang kadaghanan miingon nga first time pa kini sa Parokya ug bisan sa atong lungsod nga naghimo kita ug street dancing. Kadaghanan miingon usab nga bibo kaayo ang atong pista mao nga bisan tuod ug kapoy apan sulit usab hinungdan nga sa akong pagpangutana kon mousab pa ta ang tanan usab misinggit nga mousab pa!
Apan nasayod ba kamo nga kining tanan namugna gikan sa usa lamang ka panglantaw? Busa tuguti nga akong ipaambit kaninyo kining mosunod nga mga pamalandong bahin niining gahom sa usa “The power of one”. Matud pa, ang usa ka awit makapahinumdom kanato sa atong kagahapon. Ang usa ka bulak makapapukaw sa atong damgo.
Ang usa ka kahoy maoy sinugdanan sa lasang. Ang usa ka pahiyom maoy sinugdanan sa panaghigalaay. Sama nga ang usa ka bitoon mahimong makagiya sa usa ka barko nga naglawig sa kadagatan. Ang usa ka boto mahimong makausab sa nasud, ang usa ka bidlisiw sa adlaw makahatag kahayag sa atong lawak sama nga ang usa ka kandila makadan-ag sa kangingit ug ang usa ka katawa makawagtang sa kaguol.
Ang taas nga panaw nagsugod sa usa ka lakang. Sama nga ang usa ka milyon nagsugod sa usa ka dako ug sama nga namugna ang usa ka katilingban sa mga tinun-an tungod sa usa ka panglantaw ni Jesus.
Mga igsoon ang tanan nagsugod diha sa usa apan dili usab mahimo nga magpabilin ang usa ka panglantaw o damgo tungod kay nagkinahanglan man kini nga mahimong makakatilingbanon sa iyang kaugalingon.
Gisugdan ni Jesus ang iyang katilingban pinaagi sa usa ka pagtawag ug ang nakanindot pa gayod niining iyang pagtawag tungod kay nagpili siya dili sa mga maalamon kon dili sa mga ordinaryong mga tawo nga mga mananagat aron tudloan sila sa pagpanagat ug mga tawo aron nga pinaagi sa ilang kinabuhi ikapadayag ang iyang pagka Dios.
Hinaot nga sama kanila nga gipili sa Dios makaambit usab kita sa ilang kadasig ug sa ilang kamalahutayon nga bisan paman kon dili sa tanang higayon nga sila makakuha apan mobalik gihapon sila uban sa pamasin ug panghinaot nga unta sila makakuha.
Salamat sa inyong pagkagasa ug pagkabahandi sa atong simbahan, manalangin kanato ang Dios....

ANG PAGPANGANDAM

Dunay text nga nagkanayon: dunay lolo ug lola nga nakadesisyon atol sa ilang anibersaryo nga ilang lab-ason/sariwain/hinumduman/ibalik-lantaw pag-usab ang ilang kaagi kaniadto sa dihang nanguyab pa si lolo kang lola. Ug tuod man sayo kaayo sa buntag si lolo intawon sayo kaayo nga nanguha ug bulak, suot sa iyang pinanindot nga attire kaniadto ug naghulat siya kang lola sa daplin sa sapa…apan, udto nalang wala pay lola nga mipakita mao nga miuli nalang si lolo, sus pastilan pagsaka pa niya sa kwarto didto iyang nakita si lola nga naghigda-higda sa kama. Nganong wa man ka mitunga sa atong sabot, nangutana si lolo? Si lola maulawon kaayo nga nagtago-tago sa unlan ug mitubag...wala man gud ko tugti ni mama ug papa...sus Ginoo mao diay to nahitabo kanila 75 years ago...and that’s the end of the story folks.
Karong ikaduhang domingo sa adbento ang tema nga gipadak-an sa ebanghelyo mao ang “pagpangandam” ang pagpangandam tungod kay dunay moabot...ug kon akong balikan ang usa sa akong mga wali nga gihimo kitang mga Pilipino naila man gayod kita sa atong Filipino way of hospitality o ang atong natural nga kinaiya sa pagkamaabi-abihon.
Ihemplo niini nga basta duna gani tay bisita, atimanon jud na nato pag-ayo, sinilbihan ug pinahiluna. Gani tungod sa atong dakong pagtagad sa atong bisita ato jud nang ipagawas ang atong mga tinaguan nga mga gamit sama sa plato, baso, kutsara ug uban pa. Kahinumdom ko panahon sa ordinasyon nalukop intawon ang komitiba sa accomodation ug panghulam kay kulang man ug gamit ang parokya, nangandam lagi kay daghang mga bisita ug moanhi ang Obispo...
Unya kon ang mga bisita anha matulog sa atong panimalay, atong ipagawas ang atong tinaguang mga habol, punda, tualya ug bedsheet nga nanimaho pang alkampor depensa sa ok2x tungod kay dunay tay bisita, unya paghuman ato napod hipuson ang mga gamit ug magmantiner intawon sa mga karaang mga gamit...pinoy talaga!
Usahay kon dunay okasyon unya kon walay ikagasto ang uban mangutang kay maulaw sa bisita, unya panahon na sa pagpangaon unahon jud ang bisita mao niy hinungdan nga migawas ning estorya sa singgit sa bata, Nay! Wa na jud, gibali na jud nay! Wa man diay ma orient ang bisita....
Unya kon makapangaon na dayon dunay moabot bahalag wala maapil sa budget manangpit jud ta, lahi sa mga langyaw kay bahalag gigutom ka basta kay wa kay apil sa budget di jud na sila manangpit. Lahi natong mga pinoy kay bahalag gamay o kulang ang atong pagkaon basta kay nakapaambit.
Ingon niana kita kon makapangandam pero ug dili gani mantiner jud ta ug tinapa kay espesyal gud hehe. Ingon niini usab ang atong paagi sa pagpangandam gani karon kay taliabot ang pasko kita ninyo ang sulod sa atong simbahan napuno ug mga dayan-dayan, ang akong panghinaot mao nga dili lang unta kita taman sa pagbutang ug daghang mga dekorasyon dinhi sa sulod sa simbahan o sa inyong mga tagsa-tagsa ka pinuy-anan alang sa pasko kon dili labaw sa tanan magbutang unta usab kita ug mga dayan-dayan sa atong mga kasing-kasing.
Si San Juan nga matud pa sa ebanghelyo mao ang tingog nga nagsinggit sa kamingawan “Andama ninyo ang iyang dalan”. Si Juan mao gayod ang tawo nga nag-andam sa mga kasing-kasing sa tawo sa pag-abot sa Ginoo. Siya mao kadto ang nag-abuno sa mga gansalsalon ug puno sa libaong nga kasing-kasing sa tawo nga nabulit sa nagkadaiyang matang sa pagpakasala sa iyang pag-ingon “hinulsoli ug biyai ninyo ang inyong mga sala”. Niining panahuna, dili lamang ang atong mga kalsada ang puno sa libaong kon dili lakip na usab ang atong mga kasingkasing.
Ang paagi sa pag-andam ni Juan sa mga tawo alang sa pag-abot sa Ginoo sa ilang taliwala mao man ang iyang panawagan sa paghinulsol ug pagbiya sa ilang mga sala ug alang kanako kining maong panawagan alang usab kanato karon bisan tuod kon usahay maghuna-huna ta nga wa man tay sala...kay sa pagtinuod lang walay pweding moingon kanato nga wala tay sala mao man gani ang hinungdan nga sa pagsugod sa misa mangayo ta ug pasaylo sa Ginoo, kinahanglan nga mangompisal ta sa atong mga sala sa pulong, sa buhat, sa huna-huna ug sa wala pagbuhat nato sa angay’ng buhaton.
Taliabot na usab ang pasko ug dunay mga text message nga magpahinumdom kanato nga kini mao ang panahon sa pagbag-o, ang panahon sa pag-usab ug sa pagpuyo ug bag-ong kinabuhi. Kini ang panahon nga maghimo kita ug mga resolutions.
Hatagan ta unta ug higayon ang matag usa kanato ilabi na ang atong mga kasingkasing nga makapangayo ug pasaylo ug andam usab unta nga mopasaylo dili lang tungod kay pasko kon dili tungod kay kining maong gawi mao man ang maghatag kanato ug kalinaw...
Kini unta ang angay nga pagpangandam nga atong himoon aron makasaulog kita ug usa ka tinuod nga pasko.
Sa katapusan, kahinumdom sa kanta nga pinaskuhan: matud pa, pasko karon panahon sa pagpasaylo ug paghigugma sa isigkatawo, sa kabubut-on pagpakig-uli nga nasilo tungod sa panagbangi. Ang pagpuyo sa Kritohanong mithi ug pagpalambo sa kinabuhi maoy bililhon nga pinaskuhan nga ikahatag sa tanan...maayong pasko in advance...

ANG MAKALUWASNONG PAGTOO

Sa milabay nga mga pagbasa sa ebanghelyo kanunay natong madungog nga si Jesus nag-ayo sa mga masakiton. Giayo niya ang mga giyawaan, ang mga buta, ang mga sanlahon ug karon sa pagbasa sa ebanghelyo giayo niya ang tawo nga paralitiko.
Basi sa atong mga nakita sa mga tawo nga naparalisa, maglisod jud sila sa ilang kaugalingon sa paglihok o pagbuhat sa gusto nilang buhaton sa ilang kaugalingon.
Ingon niini ang kinabuhi ni Fr. Mestdag kanhi, sulod sa napulo kapin nga mga katuigan giatiman siya sa mga tawo nga miunong kaniya hangtud sa katapusan sa iyang kinabuhi. Sila mao na ang magligo, mag-ilis sa iyang sinina, mag-ilis sa iyang diaper ug uban pa tungod kay sa iyang kahimtang mura siya’g buhi nga patay ug maoy akong pagtoo nga sama usab niini ang kahimtang niining tawo nga paralitiko nga giyayungan sa mga tawo.
Natandog si Jesus dili sa ilang gibuhat nga pagdayong sa masakiton ug ang ilang pag-abli sa bubong sa balay kon dili natandog siya tungod sa dakong pagtoo niining mga tawhana. Pinaagi sa ilang dakong pagtoo nga miingon si Jesus gipasaylo na ang imong mga sala. Gisulti ni Jesus kini tungod sa ilang naandan nga huna-huna nga ang pisikal nga sakit adunay kalabutan sa sala nga nahimo sa tawo.
Sa laing bahin, ang mga Pariseo usab nga tua didto imbis nga malipay, nagbagulbol hinoon sa gipamulong ni Jesus kay alang kanila way lain nga makapasaylo ug sala gawas sa Dios ug kana ang dili nila madawat!
Apan aron kamo motoo nga ang anak sa Tawo may gahom dinhi sa yuta sa pagpasaylo ug sala, miingon siya sa tawong paralitiko; bangon, tindog bitbita ang imong banig ug pauli sa inyo.
Gihimo ni Jesus kini dili lang aron pagpakita sa iyang gahom ug paghatag ug pruweba sa alang sa mga pariseo kon dili labaw sa tanan aron sa pagguba sa ilang panglantaw...nga ang pisikal nga sakit alang kang Jesus walay kalabutan sa sala sa tawo.
Ikaduha nga gipadak-an ni Jesus mao ang pagtoo, ang pagtoo sa upat ka tawo nga nagyayong sa masakiton ug ang pagtoo mismo sa paralitiko nga maoy nahimong pundasyon sa iyang pagkaayo.
Ikatulo nga punto nga gihatagan ni Jesus ug gibug-aton mao nga ang kaayuhan naa maggikan sa atong kaamguhan sa atong kaugalingon. Si Jesus uban sa mga tawo sulod sa balay, ang masakiton gipasulod sa balay aron mamaayo, ang mga Pariseo bisan tuod kon atua sa sulod sa balay apan ang ilang pagbati atua sa gawas hinungdan nga wala nila makita ang kaaliman nga nahitabo ug sa makausa pa kining mga ordinaryong mga tawo hinoon maoy midawat sa gahom sa Dios sa ilang taliwala!
Sa katapusan, ang pinaka importante nga atong maamguhan sa mga pagbasa mao ang kabililhon sa pagpuyo sa atong kinabuhi diha sulod sa katilingban. Ang tawong paralitiko naayo dili lamang pinaagi sa iyang pagtoo kon dili pinaagi usab sa pagtoo sa mga tawo nga nagdayong kaniya.
Kita usab usahay daw nahisama sa tawong paralitiko nga maglisod sa paglihok sa atong kaugalingon lamang paningkamot hinaot nga makabaton usab unta kita ug mga higala ug katilingban nga moagak kanato ngadto sa atubangan ni Jesus.
Busa buot akong magpasalamat kaninyo, kamo nga maoy akong katilingban dinhi sa Payao tungod kay nagtabang usab kamo sa daghang mga paagi sa pag-agak kanako ngadto sa sabakan sa atong Ginoo. Maoy akong pag-ampo ug panghinaot nga unta anaa kamo kanunay kay sama sa akong ginaingon, ang akong pagkapari makabaton lamang ug tinuod nga kahulugan uban kaninyo, diha kaninyo, ug pinaagi kaninyo...

ANG LUGAS SA TRIGO

Sa dihang namatay si mang Oleg, ang tawo nga naghostage kang Santino grabe ang kaguol nga gibati sa bata. Apan nindot usab ang giingon ni Bro, nga ang mga patay dili man jud namatay totally tungod kay hangtud nga ato silang mahinumduman magpabiling buhi ang ilang pagkatawo sa atong kasingkasing.
Kini maoy akong pagtoo nga konkretong hubad sa giingon ni Jesus sa ebanghelyo “Ang usa ka lugas nga trigo magpabilin nga usa ka lugas gawas kon kini ipugas sa yuta ug mamatay, kon kini mamatay mamunga kini ug daghan”. Murag lisod sabton dili ba? Tungod kay unsaon man pagpamunga ug daghan ang usa ka tanom kon kini mamatay? Sayod kita nga ang usa ka buhi nga tanom mao lamang ang makahatag ug bunga…sama sa mangga pananglit.
Apan sa laing bahin, kon atong sulayan sa pagtuki ang paagi kon giunsa sa pagtubo sa usa ka tanom atong masayran nga husto gayod ang giingon ni Jesus. Pananglitan, kon motanom ka ug mangga dili jud mogitib ang usa ka lunghaw’ng tanom hangtud nga dili mamatay ang usa ka liso sa mangga. Kay inigtubo na sa maong tanom dili mo naman hikit-an ang liso kon dili ang usa ka kahoy.
Niining maong sambingay gipadayag ni Jesus kon unsa ang mahitabo sa iyang kinabuhi sa umaabot, nga kinahanglan nga mamatay siya aron mamunga siya ug daghan nga ang buot ipasabot aron pagdani o pagdala balik ngadto sa iyang Amahan ug daghang mga tawo.
Niining semana kapin nga nahibilin sa dili pa ang semana santa, kini maoy usa ka pagpahinumdom kanato nga kita usab nagkinahanglan nga makabaton usab sa kaisog sa pagpakamatay not physically kon dili ang pagpatay sa atong kaugalingong garbo aron makakat-on kita sa pagpasaylo sa uban, sa pagpatay sa atong kahakog aron nga makakat-on kita sa pagpaambit, sa pagpatay sa atong pagmaduhaduhaon aron nga makakat-on kita sa pagsalig, sa pagpatay sa atong kasuko, kasilag, pagdumot aron nga makakat-on kita sa paghigugma. Kay niining tanan, dili nato ikalalis nga kita giluwas pinaagi sa kamatayon ni Kristo.
Hinaot pa unta nga makahimo kita sa ingon karon kay ang magmahal sa iyang kaugalingong kinabuhi mawad-an hinoon niini apan ang dili mahinugon sa iyang kinabuhi niining kalibutana magpatunhay hinoon niini alang sa kinabuhing dayon.
Sa katapusan, angay usab natong hinumduman ang giingon ni Jesus “Ang buot mag-alagad kanako kinahanglang mosunod kanako aron kon hain ako, atua usab ang akong sulugoon”.

ANG LIHOK SA ESPIRITU SANTO

Sa kasinatian kon dunay emergency sama pananglit sa sunog naa jud kanunay sa tawo ang iyang natural instinct o kinaiya nga kon motaas ang iyang level sa adrenalin nga tungod niini makahimo siya sa pag-alsa sa mga butang nga dagko ug bug-at pa kay kaniya. Unya pagkahuman na maglisod gani intawon ang 5 ka tawo pagdayong sa iyang gialsa.
Ingon niana ka katingalahan ang mabuhat sa tawo kon adunay mosulod kaniya. Kana bitaw’ng giingon nila nga gitugahan unya magsugod dayon siya sa pagpanambal, atong makita nga ang iyang gihimo nga pagpanambal kana tungod sa unsay naa kaniya nga iyang naambitan. Sama usab sa kasinatian sa usa ka tawo nga human niya madawat ang gasa sa Espiritu Santo makahimo siya sa pagsulti ug laing mga pinulungan sama sa nahitabo sa mga Apostoles ug sa mahal nga birhen Maria panahon sa Pentekostes…
Kining maong kasinatian mao usab ang nahitabo kang Zacarias nga tungod kay napuno siya sa Espirtu Santo nakahimo siya sa pagpanagna ug nag-awit siya ngadto sa Dios tungod sa iyang pagdawat sa dakong gasa gikan kaniya nga mao ang iyang anak. Usa ka yano kaayo nga buhat gikan sa kasingkasing nga mapasalamaton.
Matud pa sa usa ka estorya, dunay usa ka tawong kabus nga ang iyang bugtong bahandi sa iyang kinabuhi mao ang iyang libro nga way laing sulod gawas sa pulong pasalamat. Ang iyang gihimo, sa matag higayon nga adunay motabang kaniya madako man o magamay, iyang isulat ang pulong nga salamat sa maong libro. Hangtod nga miabot ang panahon nga nakadesisyon siya sa pagbaligya sa iyang bahandi o sa maong libro ngadto sa usa ka negosyante.
Natingala ang negosyante tungod kay sa matag higayon nga iyang butangan ug bulawan ang pikas nga timbangan mosamot man hinoon ka bug-at ang bili sa maong libro. Sa laktod nga pagkasulti, ang maong tawo nadato tungod sa maong libro.
Sa laing bahin tungod kay nasina ang iyang silingan sa nahitabo sa iyang kinabuhi busa ang iyang gibuhat nagpalit pod siya ug libro ug iya dayong gipuno kini sa pagsulat sa pulong “salamat”. Apan dako usab ang iyang katingala tungod kay sa didto na sa negosyante bisan unsa ka gamay nga bulawan nga gibutang sa timbangan walay bili ang maong libro nga tungod niini gisilotan hinoon siya sa kamatayon.
Ang leksiyon nga atong makat-unan gikan niining maong estorya mao nga dili mahimo nga atong dayaon ang tinuod nga kahalugan sa pulong sa pasalamat...kay makahimo man tingali kita pagbalik-balik paglitok niini apan kon walay igong gibug-aton wala gihapoy kini’y kahulugan.
Busa karong nga ania na kita sa katapusang kaadlawon sa atong pagtukaw samtang gapaabot kita sa pagkatawo sa atong manunubos, sama ni Zacarias, sama usab sa mahal nga birhen Maria makamao usab unta kitang mopaabot sa atong pasalamat ngadto sa Ginoo...
Magpasalamat tungod kay niining usa ka tuig sa atong pakig-uban sa usag-usa nagsurvive gihapon ta, usahay dunay molihay gamay pero salamat sa Ginoo tungod kay nia kita karon padayon nga nagkauban sa pagpaabot sa anak sa Dios dinhi sa atong taliwala.

ANG KAUSABAN

Kung mobalik-lantaw kita sa kasinatian mga sa mga balaang tawo kaniadto atong masabtan nga human sila gipili sa Dios, ang Dios mismo maoy nagpili ug naghatag kanila ug bag-ong pangalan human nila mailhi ang Ginoo…sama pananglit ni Abraham nga sa wala pa siya makaila sa Ginoo gitawag siya ug Abram. Sama pananglit ni Jacob kansang ngalan nausab ngadto sa pagka Israel. Ang pangalan ni Levi usa sa mga Ebanghilista nga naila nato karon sa pangalan nga Matthew, si Simon nga mas naila nato sa pangalan nga Pedro ang atong unang Santo Papa. Si Saulo nga mas naila nato sa ngalan nga Pablo ug maoy atong patron sa parokya...
Ang pagkabag-o sa ilang pangalan human mabag-o ug mausab ang ilang kinabuhi tungod sa usa ka hitabo maoy usa ka dakong timaan nga sila gipili gayod alang sa usa ka misyon o tahas...ug kini mao man usab ang nahitabo karong sa Ebanghelyo sa dihang gipatud-an sa Dios ang iyang anak sa pag-ingon “Ikaw ang pinangga kong anak nahimuot ako pag-ayo kanimo”.
Maoy akong pagtoo usab mga igsoon nga sa panahon nga kita midawat sa sakramento sa bunyag ang Ginoo miingon usab kanato “Ikaw ang pinangga kong anak nahimuot ako pag-ayo kanimo”. Apan usahay tungod usab sa atong pagpasagad sa atong pagkabinunyagan maoy hinungdan nga mabulingan ang atong kaputli human kita kahugasan sa sala...tungod kay anaa man kanunay kanato nag-uban2x ang atong tawhanong kahuyang nga usahay maoy mahimo natong rason o alibi nga dili kalikayan nga makasala kita tungod kay tawo raman...
Apan sa laing bahin, ang dignidad sa usa ka tawo misaka ug gihatagan ug dakong bili sa dihang nagpakatawo ang anak sa Dios aron nga mahisama kanato gawas sa sala busa dili na unta angayan pa nga moingon kita pasayloa ko kay tawo lamang ako tungod kay human na kita gilukat pinaagi sa kinabuhi sa anak sa Dios.
Sa akong kinabuhi lang mismo, daghan ang nausab karon nga pari nako. Sa una, nakasuot ko ug pantalon panahon sa akong graduation sa elementary nga tinahi pa jud intawon sa among inahan, pero karon moabot na hapit ug napulo ka buok akong pantalon. Sa una, maglisod intawon ug palit ug bag-ong t-shirt ang among ginikanan bisan ug pasko ug panahon sa akong birthday apan karon nag-abot ang akong mga t-shirt tungod kay daghan man mo nga mohatag. Kon kaniadto madunot nalang intawon ang tikod sa akong sapatos ayha ko mapalitan apan karon inigsulod nako sa akong kwarto makita nako ang upat kaparisan sa sapatos, lima ka buok parisan sa sandal, ug ang tulo ka paris sa tsenilas. Kon kaniadto matulog ko nga usa ka buok unlan apan karon halos usa na ka dosenang unlan ang tua sa akong kwarto. Kon kaniadto makontento nako nga maghike apan karon de motorsiklo nako, kaniadto nahanas ko sa pagsulat ginamit ang ballpen apan karon de computer nako ug daghan pa.
Hinoon wala man sad ko magreklamo nga naa ning tanan nga akong gihisgutan apan sa dihang namalandong ko bahin niini nakapangutana ko wala ba kaha makaeskandalo ang akong kinabuhi diha kaninyo? Nga sa dayong piyong sa akong mga mata makapangutana ko sa akong kaugalingon kon ang akong kinabuhi nakadasig ba sa uban, naka inspire or mao ba kaha ang hinungdan aron nga kawad-an sa paglaom ang uban?
Daghan man tingali ang nausab sa akong kaugalingon nga ang uban niini tungod sa hinungdan nga pari ko apan sa sulod sa akong kasingkasing nagapabilin ang pangandoy nga mahimong usa ka yano nga tawo. Ug tingali kamo usab makatandi usab sa inyong kinabuhi kon unsa kamo kaniadto ug karon. Dili man tingali dautan ang unsay anaa kanato karon apan ang hagit kanato mao ang pagpuyo sa kinabuhi nga haduol kanunay sa Ginoo ug nga sa katapusan moingon kanato ang Dios “Ikaw ang pinangga kong anak nahimuot ako pag-ayo kanimo”. Manalangin unta kanato ang Ginoo....

ANG KAKULANG SA PAGTOO

Usa sa mga show nga akong nga gihimo sa porchop duo nagkontest ang duha kon kinsa ang sikat pinaagi sa pagkanta niadtong mga karaang mga kanta ug nagkasabot sila nga ilhong mananaog kadtong hatagan sa mga tawo ug kusog kaayo nga palakpak.
Unang kanta palang ang mga tawo kusog na kaayo nga mipalakpak…busa nadihado na ang ikaduha nga mokanta kay giingnan naman siya sa isa nga pildi na jud siya…busa sa dihang siya na usab ang mikanta…mipakpak pod ang mga tawo ug misamot pa gyod kakusog tungod kay iya man gihadlok nga kadtong dili mopakpak hubagag ilok…well of course it’s a joke aron paglingaw sa mga tawo.
Kon atong tan-awon pag-ayo ang ilang gihimo ang pagpakpak sa mga tawo sa unang mikanta tungod kay giganahan sila sa performance, mi bilib sa abilidad ug kini mao ang ganti nga angay gayod kaniya. Ang ikaduha, ang mga tawo midayeg man sa iyang katakos tungod kay nalingaw usab sila apan ang iyang gihimo nga paghadlok sa mga tawo maoy usa ka ihemplo nga atong matandi sa nahitabo kang Zacarias nga amahan ni Juan nga magbubunyag…tungod sa iyang kakulang sa iyang pagtoo sa gisulti kaniya sa anghel ang nahitabo gihatag man tuod ang maong gasa apan in return gisilotan usab siya sa anghel nga tungod niini dili na siya makasulti hangtod sa pag-abot sa adlaw nga natuman ang gisulti sa anghel.
Mura ba siya ug kasinatian nga matawag nato ug swerte nga dimalas…pananglitan, matawag nato nga swerte tungod kay bisan pa ug naulahi siya apan nakasakay pa jud siya sa bus…apan dimalas kay tunga-tunga sa ilang byahe sige ug kadaot ang sakyanan nga hapon na siya nakaabot sa iyang padulngan…murag sama sa kasinatian ni Teban nga nalipay kaayo siya nga gibiyaan siya sa iyang asawa…apan ang iyang kalipay nahimong kasub-anan tungod kay ang iyang asawa gipulihan man sa iyang ugangan…
Sa unang pagbasa, si Manoa ug ang iyang asawa ang mga ginikanan ni Samson hingpit gayod nga nagsalig sa gisulti sa anghel sa Ginoo nga matuman gayod ang iyang gisaad ug nahitabo gayod kini sumala sa mensahi sa anghel..
Apan sa kaso ni Zacarias ug Isabel lahi ang nahitabo kay bisan kinsa naman tingali, kinsay ba goy magdahom nga sa ilang pangidaron makaanak pa sila…murag akong mahuna-hunaan ba nga kining si Zacarias ug Isabel murag si tatay baldo ug nanay victorya…nga sa dihang gisultihan sila nga makaanak pamo lagi ug mahimong Obispo sa Ipil…tingali sama ni Zacarias naa usab ang pagduha-duha kay murag imposibli gayod nga mahitabo kay diin man na sa una nga kompleto pa sila ug bag-ang karon na nuon nga wa halos ang ngipon hehe…
Sa ako bitaw nga cell phone naa may magtext ug magpaila nga siya kuno si John sa PCSO ug nakadaog kuno ang akong last three digit sa akong cell number sa ilang gihimo nga raffle draw..dayon moingon pls call immediately. Asa man ko motoo ana tungod kay dayag kaayo nga pangilad lang ba kay unang-una wala koy raffle nga giapilan…wa goy gihimo kay lisod pod tingali nga makadaog ka ug lotto nga walay patad-patad di ba?
Ang akong buot ipasabot nga igsoon, dili tingali ta maglisod sa maong gasa o ganti kon duna tay gihimo sa atong kabahin…nga nakadaog ka sa lotto tungod kay mitaya ka ug numero sa lotto outlet…apan wa tay mahimo, kay ang nahitabo kang Zacarias ug sa iyang asawa mura silag midaog sa lotto nga walay patad-patad…kay sama sa giingon sa anghel “kay walay dili mahimo sa Dios”.
Busa kadtong wa pay anak, ayaw lang kabalaka makaanak ra jud mo inig-abot ninyo ug 80! Kini maoy gitawag nato ug milagro tungod kay dili man siya mahimo kon sa ato lang kaugalingong paningkamot. This is something beyond our human capacity kay labaw sa tanan kay nagkinahanglan man siya ug divine intervention o panabang sa Ginoo.
Unsa may atong makat-unan gikan niini? We cannot question God, dili ta mahimong makapangutana sa Ginoo nganong karon paman ni? Diin man ni sa una? Nganong nakadaog man ko nga wa koy patad-patad? Kay ug akoy Ginoo magbuot diay ka ug sa sunod pa nako ihatag? Magbuot diay ka kon modaog ka bisan wala kay patad-patad? Tungod kay ang Ginoo dili man jud hitupngan sa iyang kamanggihatagon. God writes in crooked ways and read between the lines.
Busa ang atong mahimo niini mao ang pagdawat sa kabubut-on sa Dios alang kanato uban sa paghinumdom sa mensahi sa anghel kay walay dili mahimo ang Dios.
Sa katapusan, maoy akong pagtoo nga may daghang mga milagro nga modangat sa atong kinabuhi kon may kasing-kasing kitang malaumon, ug matinuohon…

ANG KAHAYAG SA BITOON

Sumala sa ubang mga estorya matud pa nila nga dili lamang tulo ka hari ang miduaw sa batang Jesus kon dili upat, apan tungod sa kalangayan sa ikaupat ka hari hinungdan nga nabiyaan siya sa tulo. Apan sumala pa sa uban tungod kay tulo lamang ka mga gasa nga gihatag ngadto sa bata buot ipasabot nga tulu lamang usab ka tawo ang mihatag niini.
Alang usab kanako, dili man tingali importante kon upat ba o tulo lamang ka maalamong mga tawo ang miduaw kang Jesus kay ang tinuod mao nga giduaw siya niining mga tawo nga langyaw gikan sa halayong dapit ug kining maong mga tawhana mao ang nagrepresentar sa mga tawong Hentil nga mitoo ug midawat kang Jesus ug sa kaluwasan. Samtang sa laing bahin wala gani makahimo intawon sa pagbisita sa bata ang mga Judiyo nga kadugo ni Jesus nga unta pipila lamang ang distansiya gikan sa dapit diin siya matawo.
Busa bisan pa lang gani sa sinugdan, ato nang maila ug mahanduraw kinsa lamang kadtong mga tawo nga midawat sa kaluwasan…tua didto ang tulo ka maalamong tawo, tua usab didto ang mga kabus nga gihulagway sa mga magbalantay sa karnero, atua usab didto ang mga mananap ug ang koro sa mga anghel.
Gikan sa maong hulagway gipakita sa Ginoo nga ang kaluwasan alang gayod unta sa tanan, alang sa tanan nga moduol sa kahayag ug nangita sa kahayag. Apan dili alang kanila nga nagpuyo sa kangitngit ug sa pagpakasala.
Unsa may atong matun-an gikan niini? Dunay tulo ka punto lamang ang akong hisgutan: una, nga ang atong makanunayon nga pagpangita sa Ginoo maghatod kanato sa pag-ila kang Jesus…kini mao usab ang iyang gipamulong kanato nga walay makaadto sa iyang amahan gawas kon moagi kita kaniya tungod kay siya mao ang dalan, ang kamatuoran ug ang kinabuhi…Ang mga maalamong mga tawo nagiyahan sila pinaagi sa bitoon ug sa ilang pagpangutana kang Herodes ug sa ilang pagpangita sa Ginoo misangko sila sa batang Jesus. Sa ato usab nga pagpangita sa Ginoo gitudloan usab kita nila nga makaabot lamang kita kaniya o sa atong Amahan kung moagi kita kang Jesus…
Ikaduha, kung kita usab mga maalamong gihagit usab kita sa paghatag sa atong mga gasa ug bahandi ngadto kaniya. Ug matud pa sa akong magtutudlo sa kolehiyo miingon siya; giving is not giving unless it hurt. Nga ang paghatag dili gayod mahimong makahuluganon hangtud nga wala kay isakripisyo tungod kay ang tinuod nga paghatag kanunay man nga inubanan paghigugma. Busa ang atong pagkamaalamon masukod gayod diha sa atong gihatag o gitahan ngadto kaniya posibli dili lamang sa bulawan, insenso ug mira kon dili labaw sa tanan diha usab sa atong paggahin ug panahon alang kaniya sa pagsimba.
Ikatulo ug katapusan, gipakita usab kanato nga basta ato na gani ikahinagbo ang Ginoo dili mahimo nga magpuyo gihapon kita ug sama nga kinabuhi. Sama sa nahitabo sa tulo ka maalamong mga tawo mipauli sila agi sa laing agianan human nila makita ang batang Jesus tungod kay gipahimangnoan man sila sa anghel. Sama nga pagkaagi kita usab human nato ikahinagbo ang Dios magpuyo na usab ug bag-ong kinabuhi kay sama ni San Pablo sa dihang gikahibalag niya ang Dios nagkinabuhi siya dili na sama kaniadto kay ang iyang kinabuhi hinalad naman sa Ginoo.
Sayod kita mga igsoon nga ang atong panaw o pagpangita sa maong kahayag padayon sa gihapon hangtud nga makaabot kita sa tinuod nga kahayag nga mao si Kristo. Hinaot nga dili unta kita kawad-an sa kahayag sa bitoon pinaagi sa atong mga higala, pamilya, ug mga magtutudlo nga maoy mag-dan-ag kanato padulong ngadto sa kahayag.

ANG HIMAYA

Matud pa sa usa ka estorya sa usa kalugar adunay usa ka sikat kaayo nga pianista. Usa ka adlaw niana naghimo siya ug concert sa usa ka lugar ug tungod niini mitambong sa maong concert ang usa ka inahan kuyog sa iyang anak. Interesado kaayo kining maong inahan tungod kay gusto usab niya nga ang iyang anak mamahimo usab nga sikat nga pianista.
Kahinumdom ko sa una didto sa among barrio tungod lagi kay sayo naminyo ang among silingan mao nga kon hain gani ang bayle motambong pod sila ug magdala-dala intawon sila sa ilang anak, maghimo sila ug duyan sa daplin ug magpuli-puli intawon sila ug bantay sa bata.
Sa laing bahin balik sa atong estorya, sa didto na sila naglingkod nga nagpaabot sa pagsugod sa concert nakit-an sa inahan ang iyang amiga nga naglingkod sa unahan maoy hinungdan nga iyang giduol ug nahabilin sa lingkuranan ang gamay’ng bata. Sa hapit na magsugod ang concert, natingala ang inahan sa iyang pagbalik nga wala naman didto sa iyang lingkuranan ang iyang anak. Sa dayon nang pag-abli sa telon didto iyang nakita ang iyang anak nga naglingkod sa piano ug gitukar niya ang twinkle2x little star.
Misulod ang sikat nga pianista ug miduol sa bata ug gihunghungan niya ang bata sa dili paghunong sa iyang gibuhat. Ang gihimo sa sikat nga pianista iyang gisabayan ang bata sa pagtugtog hangtud nga migawas ang usa ka nindot nga melodiya nga tungod niini nanindog ang mga tawo ug kusog kaayo nga namakpak pagkahuman sa ilang gitugtog ug gitapos ang maong estorya sa pag-ingon: ingon pod niana ang mahitabo sa atong kinabuhi kon uban kanato ang Dios Amahan.
Si Jesus sa iyang kinabuhi nakahimo ug usa ka maanindot kaayo nga kasaysayan sa kalibutan, nakahimo ug usa ka maanindot nga huni sa kinabuhi tungod sa panabang sa iyang Amahan. Gani sa ebanghelyo karon nga atong nadungog, nga ang Amahan mismo maoy naghatag ug pamatuod sa iyang pamatuod nga si Jesus iyang Anak ug nga kinahanglan mamati gayod kita kaniya.
Sama usab kana sa atong kinabuhi, kon makalimot na gani ta sa pagsangpit ug Ginoo labi na kon hapsay kaayo ang atong kinabuhi, makabantay sad ta nga murag wala may lami ang atong kinabuhi. Kay mag-unsa raman gud na ang mansion nga balay nga gubot kaayo ang pamilya? Mas maayo pa tingali ang usa ka payag kon ang nagpuyo niini mga tawo nga nagkahigugmaay ug nagkasinabtanay. Hinungdan nga husto usab gayod si Bishop Ben Tudtud sa iyang pag-ampo sa pag-ingon “Tugawa kami Ginoo” kon hilabihan kaayo kabuhong ang among kinabuhi, kon sa kamadagayaon sa among kinabuhi nakabsan kami sa kauhaw sa paghandom sa tubig sa kinabuhi ug mitugot nga mag-anam ka hanaw ang among handurawan sa bag-ong langit.
Usahay man gud tungod kay nalingaw na ta sa atong kinabuhi dinhi sa yuta makalimot ta nga ang atong kinabuhi dili lang man taman dinhi sa yuta ug nga mosugot man ta o dili mobalik jud sa atong tinuod nga pinuy-anan uban sa Amahan.
Hinaot nga sa atong pagpanaw niining kinabuhia dili usab nato hikalimtan ang atong mga kauban labaw sa tanan dili nato hikalimtan ang atong langitnong Amahan tungod kay diha lamang kaniya anaa ang kinabuhi nga way katapusan.

ANG ATONG KAUGMAON

Ang atong mga katigulangan moingon nga ang atong mga pangalan may dakong kalabutan sa unsay atong mahimong kaugmaon tungod kay kini man ang mahimong determinant kon mamahimo ba kitang magmalampuson sa kinabuhi o dili.
Kini maoy hinungdan nga kon mahimo lang kaniadto ang tanang mga ngalan sa mga tawo naa jud magbasi sa libro nga gitawag ug almanake…ang mga karaan sad nga mga pari dili pod modawat o mobunyag kon ang mga ngalan sa mga bata nga gipili sa mga ginikanan wala o dili makita sa maong libro ug kana ang daghan kaayong mga kaso nga akong nasugatan sulod sa duha ka tuig kapin nako nga pagpuyo sa payao.
Mga ngalan nga gidugangan sa mga pari kaniadto tungod lagi kay walay mga ngalan sa Santos ug mga Martir. Ihimplo niini ang ngalan nga Elena apan gihimo sa pari nga Maria Elena nga maoy hinungdan nga wala mag-abot ang iyang record ug migasto pa hinoon siya ug dako aron pagkorihir sa iyang mga papilis kay unsaon ilabina na karon mahilig man ta ug mga ngalan nga made in US sama sa John, Peter, Paul ug daghan pa nga kung atong i-translate sa atong pinulungan ang John=Juan, Peter=Pedro, Paul=Pablo pero ganahan jud ta ug State site.
Ang ngalan nga Juan nagkahulugan ug God is gracious o ang Dios maloloy-on ug malumo tungod kay nahinumdom siya sa iyang mga pinili pinaagi sa pag-andam ug pagpadala kanila sama ni Juan nga magbubunyag.
Gani kung atong basahon ang Isaias 49:1 naghisgot kini sa pagpili kanato sa Dios bisan pa gani sa panahon nga atua pa kita sa tiyan sa atong inahan. Ang tanan gilatid sumala sa plano sa Dios busa dili na ta magbagolbol kon ginganlan ta Agaton, Macario or Flaviana sa atong ginikanan tungod kay ang maong pangalan mao ang atong identity o timailhan sa atong pagkakita.
Sama ni Juan kansang papel mao gayod ang pag-andam sa dalan sa Ginoo ug kon atong tan-awon walay usa ka gamay’ng detalye sa plano sa Ginoo nga gisayloan ug wala matuman.
Nasayran usab nato nga ang dili pagsugot sa kabubut-on sa Dios magdala sa tawo ngadto sa kalautan sama sa nahitabo sa atong unang mga ginikanan, Adan ug Eva, kana usab ang nahitabo sa kinabuhi ni Jonas, sa kinabuhi ni Judas, sa kinabuhi mismo ni Zacarias nga tungod kay wala siya magtoo sa mensahe sa anghel naamang siya ug ayha pa siya naulian sa dihang nasulat niya ang ngalan nga Juan aron maoy ipangalan sa iyang anak.
Ang hagit kanato mao ang pagsunod kanunay sa kabubut-on sa Dios kay bisan tuod kon mahimo man nga magtuman ta sa atong gusto apan sa katapusan mobalik man gihapon ta sa Ginoo busa mas maayo pa kung ingon niana nga dili na lang jud ta mobulag sa Ginoo.
Sa katapusang bahin sa ebanghelyo ang tanan nga mga silingan nila ni Zacarias ug Isabel namalandong sa ilang kaugalingon ug nangutana kon unsa kaha ang mahimong kaugmaon niining bataa? Kay tataw kaayo nga ang gahom sa Ginoo nag-uban kaniya…
Sa dihang natawo kita sa kalibutan ang atong mga ginikanan maoy nagplano unsay maayo alang kanato ug kita usab sa dihang nahamtong na ang atong panghuna-huna nagplano usab alang sa atong kaugmaon.
Apan karon ang angay unta natong ipangutana sa Dios kung unsa kaha ang iyang kabubut-on alang kanato? Mosalig unta kita sa plano sa Dios tungod kay ang pagtuman sa iyang kabubut-on maghatag man kanato ug dakong kaugmaon….

ALL SAINT'S DAY

Matud pa sa panultihon “Saints are ordinary people who do ordinary things in extra ordinary ways” ug tungod niini nahimo silang Santos tungod sa ilang talagsaon nga hiyas sa pagkinabuhi sa kalibutan. Sila kadtong nagpuyo ug kinabuhi nga sulondon ug dalaygon ug sama sa gihisgutan sa ebanghelyo nga miila sa ilang kaugalingon nga kabus sa mga butang espirituhanon.
Ang kakabus sa mga butang espirituhanon mao man ang atong mapaubsanon nga pag-angkon sa atong kaugalingon nga ang atong kinabuhi anaa magaagad sa kaayo ug sa panabang sa atong Ginoo. Kon kabus kita anaa kanunay ang pangandoy nga unta maarang-arang ang atong kahimtang. Apan diha usab sa atong kakabus nga makakat-on kita sa pagsalig sa Dios kay usahay usab kon adunahan ang tawo ang iyang pagsalig mabalhin sa iyang kabtangan ug dili na sa Ginoo.
Si Jesus miingon bulahan ang mga mapaubsanon, kadtong nagtinguha sa pagtuman sa kabubut-on sa Dios, bulahan ang mga tawo nga maloloy-on og putli og kasing-kasing, bulahan ang naningkamot nga managdait ang katawhan kay isipon sila nga mga anak sa Dios.
Ang akong ikadugang niini mao nga bulahan usab kamo nga mianhi karon tungod kay mitambong kamo niining Santos nga misa. Bulahan kamo nga mokalawat sa lawas ni Kristo kay gipakon ninyo ang inyong espiritu. Bulahan kamo nga nagaampo alang sa atong mga minahal sa kinabuhi nga mihalin na sa laing kalibutan tungod kay lahi ra jud kon kita na unya ang pamisahan, ug talagsa nalang intawon mahinumduman kay maayo gani nga dunay kalag-kalag kay makagahin jud ug panahon sa paghinlo sa sementeryo, unsaon nalang ug wala tingali sunod natong balik dinhi dagko napod ni ang mga kahoy ug tag-as na pod ang mga sagbot.
Unya kasagaran pa nga ginabuhat sa ubang pamilya magdala sila ug mga pagkaon, ilimnon ug mga butang nga hilig og paborito sa namatay nga nahulog nalang ug picnic ang maong panagtapok.
Apan labaw unta niining tanan mao ang paggahin ug panahon sa mga pamilya aron sa pag-ampo alang kanila nga mihalin na ngadto sa laing kinabuhi. Wa na sila magkinahanglan ug pagkaon ni ilimnon o unsa pang mga butang nga inyong giandam, ang ilang gikinahanglan labaw sa tanan ang inyong mga pag-ampo ug ang paghinumdom kanila atol niining Santos nga misa.
Busa buhaton ta unta karon ang atong angay nga buhaton samtang makahimo pa kita ug may panahon pa kay lisod na kon ayha pa ta molihok kon talisalop na ang adlaw.
Angay natong hinumduman nga ang kinabuhi sa mga Santos dili biya usab layo sa atong kinabuhi tungod sila mga tawo man usab nga sama kanato.
Hinaot nga ang Ginoo diha sa iyang kamaloloy-on mopadayon na sa atong mga minahal sa kinabuhi ngadto sa iyang gingharian ug nga kita usab sa atong kaugalingon makakat-on sa pagpuyo sa atong kinabuhi sa dili kasarangan nga paagi…sa makausa pa atong hinumduman ang ginaingon “Saints are ordinary people who do ordinary things in extra ordinary ways”.
Manalangin unta kanato ang Ginoo….

ALL LINES ARE BUSY

Sa milabay nga mga semana human ang pista sa parokya ug hangtud karon nahimong busy kanunay ang akong mga schedules. Kanunay wala ko sa parokya ug ga segi ug lakaw kay dunay mga seminar ug mga meeting nga kinahanglan akong tambungan. Daw naanad na man lang sad ko niini nga kinabuhi nga kanunay busy ug kanunay nga nagdali tungod kay dunay ginaapas nga kinahanglan usab mahuman. Ang mga tawo usahay sa barrio makapangutana jud nganong kanunay ko gadali nga bisan bag-o pa lang gani human ug kaon ga bit-bit napod ko sa akong bag kay mosibat na.
Hangtud nga miabot ang panahon nga gihilantan ko, gitrangkaso ug gani bisan karon lain pa akong pamati sa akong lawas. Dili ko ganahan nga molihok, gikapoy ko, sakit akong kalawasan, labad akong ulo ug luya akong lawas. Nahubag na akong ilong sinikma, masamad na gani ug pinahid intawon sa panyo.
Sa pirmero pa lang niini, gabagolbol ko ngadto sa Ginoo imbis duna koy daghang mga schedules mao pay isiaw ning trangkaso. Apan sa hinay-hinay ako usab nga napamalandungan nga kining tanan paagi usab sa Ginoo to slow me down tungod kay ug maayo lang sad ko ug lawas di man sad ko kapuyo kay kanunay’ng busy. Niining paagiha akong nasabtan kon giunsa ko pagpamahal sa Ginoo kay dili siya buot nga matabunan akong relasyon ngadto kaniya tungod sa mga trabaho. In a way akong nasabtan nako nga kinahanglan sad nga mo relax ko…busa maoy akong pagtoo nga kon gihatagan ta sa Ginoo or gitugutan niya nga mahitabo kini sa atong kinabuhi kana tungod kay may gusto siyang ipaabot kanato nga masabtan lamang nato kini kon makagahin kita ug panahon sa pagpamalandong ug labaw sa tanan diha sa pag-ampo.
Usahay man gud mabusy ta diha sa mga buhat sa Ginoo apan kasagaran mahikalimtan nato ang Ginoo nga maoy tag-iya sa atong mga trabaho.
Niadtong usa ka gabii sa dihang nagtan-aw ko sa drama sa kinabuhi ni Santino, niadtong panahon nga hilimatyon si Joy…ang tanan nataranta ug nagluhod ug nag-ampo. Apan ang yano nga gibuhat ni Santino mao ang pagpakig-estorya kang Bro nga mao si Jesus. And I would like to pick it up, sa atong kinabuhi kanunay man tang busy nga usahay makalimot ta nga duna tay kauban ug anha pa ta makaalinggat nga importante sila kon wala na sila diha uban kanato apan bisan pa gani kon mawala pa ang tanan ang pinaka seguro mga igsoon mao nga ang mahibilin kanato mao ang Ginoo.
Hinungdan nga kinahanglan makakat-on gihapon kita sa pagpiko sa atong mga tuhod, sa pagluhod aron sa pag-ampo aron sama sa ugangan ni Pedro nga human siya mamaayo, human kita makadawat sa tanan gikan sa Ginoo kay wala man tingaliy butang wala nga maggikan kaniya, nga kita usab mamahimong molihok aron sa pagpaambit.
Kon atong tan-awon ang kinaiya nga gipakita ni Jesus sa ebanghelyo, atong nadungog nga wala siya’y hunong sa paglihok diha sa pagsangyaw sa maayong balita ug sa pag-ayo sa ilang mga balatian kini bisan pa taliwala sa iyang personal nga panginahanglan nga nagkinahanglan siya ug pahulay apan ang wala niya hikalimti mao ang iyang relasyon ngadto sa iyang amahan pinaagi sa paggahin ug panahon diha sa pag-ampo.
Ikaduha, nadungog usab nato nga human mamayo sa iyang sakit ang ugangan ni Pedro siya mismo misilbi ngadto kanila ug sama sa akong ginaingon mao man unta kini ang angay usab natong buhaton nga kita usab human makadawat ug kaayuhan, grasya ug panalangin molihok usab unta aron mopaambit.
Ikatulo nga kinaiya nga gipakita mao ang kinaiya sa mga tawo nga nagsunod-sunod kang Jesus dala ang ilang mga masakiton. Una, ang pagsunod kang Jesus dili tungod kay nakaila sila kaniya ug nakasabot sila sa iyang mensahe kon dili tungod kay gusto silang mamaayo sa ilang giantos labaw sa tanan tungod kay nakakaon sila…
Apan taliwala niining tanan anaa ang makanunayon nga pagtagad ni Jesus sa ilang mga panginahanglan ug kini mao ang dakong hagit alang kanato nga diha usab sa atong pag-alagad o pagpaambit nga dili ta magpili kon kinsa ang atong alagaran…
Sa katapusan tuguti nga akong ipaambit usab kaninyo kining maanindot kaayo nga pamalandong…
Matud pa, ang Ginoo dili mangutana kanimo kon unsang klase sa sakyanan ang imong gi-driban hinoon mangutana siya kon pila ka tawo ang imong gipasakay ilabina kadtong wala intawoy sakyanan? Ang Ginoo dili mangutana kanato kon unsa ka dako ang yuta nga gibarugan sa atong balay hinoon mangutana siya kon pila ba ka tawo ang atong gipadayon sa atong mga pinuy-anan? Ang Ginoo dili mangutana kanato kon unsa kadaghana ang atong mga sinina hinoon mangutana siya kon pila ka tawo usab ang imong gibistihan? Ang Ginoo dili man mangutana kon kapila ka na promote hinoon mangutana siya kon giunsa nimo pagpromote ang uban? Ang Ginoo dili man mangutana kanato kon pila ka buok atong mga higala hinoon mangutana siya kon nahimo ba usab kita nga tinuod nga higala ngadto kanila?
Hinaot nga makakat-on kita sa pagsunod sa panig-ingnan ni Jesus diha sa pag-alagad nga wala magpili kon kinsa ang iyang alagaran ug labaw sa tanan nga taliwala sa atong ka busy makasangpit gihapon kita sa Ginoo…

ANG MAY IYA DUNGANGAN PA, APAN ANG WALA KUHAAN PA

Sa kagustuhan nga masayran nila unsay ilang mahimong kaugmaon nagkasabot si Pedro ug Juan nga magpatagna unsay ilang mahimong kapalaran. Tuod man sa didto na sila miingon ang mananagna nga madato si Juan samtang si Pedro giingnan sa tigulang nga bisan ug unsaon nimo Pedro di jud ka moansenso.
Pag-uli sa ila, si Pedro tungod kay nasayod man unsay iyang mahimong kapalaran naningkamot kutob sa iyang mahimo nga makapundar hangtud nga nakaeskwela siya, nakahuman, nakatrabaho, naminyo ug medyo nahayahay kay nakaasawa man siya ug maestra. Matud pa nila kon makaasawa kuno ug maestra karong panahuna hayahay naman kay bisan abag-abagan nalang ug pananggot ug guma fights na!
Samtang si Juan tungod kay naghinalig nga madato siya walay laing gihimo, galingkod-lingkod lang, segi dula ug baraha, tong-it ug tsikitsa, usahay pod sideline siya ug compute sa swertres may nalang makatarget diay….
Sa laktod nga pagkasulti mga igsoon 20 years human sila magpatagna sa ilang kapalaran, si Pedro maoy nadato ug si Juan ang napobre ngano man? Tungod kay ang kapalaran sa tawo wala mag-agad sa atong mga palad kon dili kon giunsa nato sa pagpaningkamot! Amen….
Dunay daghan niini karon sa atong katilingban nga dali ra kaayong mahugno, imbis kay gamay pa ug kinitaan dili kaayo hinoon maningkamot ug kanunay nga magbagotbot, daghag reklamo sa kinabuhi. Apan kadto bitaw mga arangan mao pa hinooy kugihan.
Dunay daghan nga mas mopili pa nga ilubong sa yuta o dili gamiton ang ilang mga kahanas kay nahadlok man nga moresgo ug kini mao ang lingtunganay sa ebanghelyo sa pag-ingon ni Jesus nga ang may iya hatagan pa ug dugang ug makabaton siya ug labaw pa sa iyang gikinahanglan, apan ang walay iya, bisan gani ang diyutay nga iyaha kuhaon pa gikan kaniya.
Tingali ang uban kaninyo moingon unfair tungod kay sa sinugdanan palang nadungog nato nga dili managsama ang paghatag sa tag-iya sa puhunan ngadto sa iyang mga sulugoon kay ang usa gihatagan niya ug 5 ka libo, ang usa gihatagan niya ug 2 ka libo ug ang lain pa 1 ka libo.
Murag makaingon kita nga murag tinuod bitaw nga dili makiangayon ang Ginoo kay bisan gani sa atong palibot makita man nato mismo kon giunsa sa pagbahin sa Ginoo ang iyang gihatag kanato.
Kaniadto samtang nag-eskwela pa ko sa college nakapangutana jud ko sa akong kaugalingon kon giunsa man pagbahin sa Ginoo ang iyang grasya kay dunay mga tawo nga dato kaayo, sakto ug barog, bright, daghag mga talento, nindot mokanta ug gwapa pa jud…samantalang ako, igo2x ra ang kahibalo, dili pod kaayo gwapo, apan bawi lang kay buotan man…
Diha sa atong katilingban kon nakabantay mo kinsa gani to ang mga tawo nga duol sa simbahan o lumilihok sa simbahan, nag-ilaid intawon sa kalisod…samantalang kadtong talagsa ra nato makita sa simbahan ug mapugos nalang pagsulod kay gidayungan naman murag mao pa hinooy gi grasyahan…unfair di ba?
Apan sumala sa giingon sa ebanghelyo ang matag usa ka sulugoon gihatagan sa amo ug puhunan sumala sa iyang katakos…ug sama sa akong giingon wala mag matter kon nakadawat ka ug 5 ka libo, 2 ka libo o usa ka libo tungod kay ang sukdanan nianang tanan kon giunsa ta kini sa pagpalambo o pagpatubo…labaw sa tanan angay tang hinumduman nga ang gihatagan ug daghan paninglan usab ug daghan ug ang gihatagan ug diyutay paninglan usab ug diyutay ra….
Busa angay tingali nga mamalandong kita kon ang ato bang gihatag balik sa Ginoo igo ba nga tugbang sa iyang gihatag kanato? O basin biya kon ang atong gihatag ngadto sa Dios kadto lamang mga salin o sobra sa atong gikinahanglan?
Ang bibliya nagsulti kanato pinaagi sa mga kasinatian sa mga Israelita nga ang atong ihalad ngadto sa Dios kadtong unang abot sa atong mga uma, kadtong mga pinatambok nato nga hayop. Sa ato pa kadtong pinaka da best!
Apan unsa may atong gihimo? Ang atong gihatag sa Ginoo usahay kadto mang dili na mahalin sa merkado. Sa akong misa sa mga barrio usahay dunay mga tawo nga moingon pasensiya na jud dre kay krisis jud kaayo gamay ra ang among halad….
Para nako ang halad dili man kinahanglan kanunay kwarta kon dili bisan unsa nga mahimong magamit ninyo sa inyong balay, magamit pod na namo dinhi sa parokya. Pananglitan, sabon, asin, asukar, tuyo, suka, utanon, lagutmon, dahon sa gabi, puso saging ug uban pa.
Busa dili nata magpaabot nga madato ta ayha pa ta mopaambit kay basin unya ug mapareha kita sa sulugoon nga inay ipatigayon ang usa ka libo gilubong hinoon sa yuta...hinungdan nga gilabog hinoon siya sa gawas ug ingon usab niini ang mahitabo kanato kon magdumili kita sa pagpatigayon, sa pagpaambit sa unsay gihatag kanato.
Sa mga retreat nga akong gihatag sa high school dunay mga bata nga pobre nga mopadayag sila nga nindot jud unta kon dato sila kay naa ang tanan, ug dunay mga dato usab nga mga bata nga moingon nga unsaon man ang kadato kon dili ka malipayon? Hinungdan nga nakapalandong ko nga ang kalipay wala mag-agad sa kadagaya sa kinabuhi kay bisan kon pobre ang tawo apan kon kontento siya mahimo siyang magpuyo nga malipayon.
Busa ang pangutana karon, asa kaha niining tulo ka mga sulugoon nato nakita ang atong kaugalingon?
Hinaot unta nga sa katapusan inigbarog nato sa atubangan sa Ginoo moingon siya maayo ug buotan nga sulugoon…sanglit kasaligan ka man, piyalan ko ikaw sa daghang mga salapi. Dali sulod ngari ug ambit sa akong kalipay….

FOR ADULTS ONLY

The following programs contains scenes not suitable for minors, parental guidance is advice… mao ni kasagaran ang pahinumdom kung motan-aw ta ug salida nga usahay moingon pa gani, For adults only! Nga ang buot ipasabot bawal ang mga bata o bawal sa mga bata. For adults only! Ug mao ni ang nakatatak sa hunahuna ug sa kalibutan sa mga tinun-an ni Jesus hinungdan nga wala nila tuguti nga makaduol ang mga bata kang Jesus tungod kay naghuna-huna sila nga ang gingharian sa Dios dili alang sa mga bata kon dili alang lamang sa mga hamtong. Kining mga kabataan walay labot sa misyon sa ilang magtutudlo kay bata pa usab kaayo sila aron makasabot sa mensahi ni Kristo, labaw sa tanan magsamok-samok lamang sila kay ang gingharian sa langit is a serious business and this is strictly for adults only.
Kon ang mga tinun-an kanunay nga mag-ilog kon kinsay ilhon kanila nga labing dako apan si Jesus usab sa laing bahin kanunay nga nangita niadtong labing iwit sa gingharian sa Dios. Kon ang mga tinun-an gikasab-an nila ang mga tawo nga nagdala ug mga bata, si Jesus sa laing nangasaba sa mga tinun-an tungod kay wala nila hisabti nga ang ginghrian sa langit ila sa sama kanila nga mayokmok sa katilingban.
Sama sa akong ginaingon kaniadto, ang mga bata wala gayod nila hatagi ug bili sa ilang kultura kay giisip lamang sila nga kabahin sa kabtangan sa ginikanan nga bisan unsay ilang gustong buhaton ngadto sa mga bata mahimo nila tungod kay wala may balaod nga nagpalipod sa katungod sa mga kabataan ug sama sa mga babaye ang mga bata giisip usab nila nga second class citizen.
Apan sa laing bahin si Jesus nagpakita ug dakong pagtagad sa mga bata sa mga mahuyang ug walay gahom, sa mga makasasala ug dinaugdaug tungod kay alang kanila kining maong gingharian sa Dios nga iyang ipaila sa mga tawo. Sa panahon sa pagbunyag kang Jesus nga gihimo ni Juan nga magbubunyag bisan tuod kon wala na niya kinahanglana ang maong bunyag, apan ang iyang gihimo maoy usa ka pagpadayag nga siya dapig gayod kanunay kanila.
Kitang tanan bisan sa atong pagkahamtong ganahan ug bata tungod kay ang usa ka bata may daghang hiyas, abilidad ug kinaiya nga wala natong mga hamtong. Ug abi bitaw ninyo, kon kitang mga hamtong makakat-on lang unta sa pagtan-aw labaw sa tanan sa pagpamalandong ug kon maantigo lang jud unta kitang maniid sa ginabuhat sa mga gagmay’ng mga bata daghan tag makutlo gikan kanila sa ilang mga kinaiya nga gipakita.
Panahon nga magdula sila, nga sila mismo mamugnaon kaayo sa ilang kaugalingon aron malingaw sila. Sa simple lang nga labay2x sa tsenilas, dampa, dakpanay malingaw na sila lahi natong mga hamtong tungod kay samtang nagkahingkod ang atong panimuot nagkataas usab ang atong paagi sa paglingaw sa atong kaugalingon, di nata ganahan moestorya kon dili makatubil ug ambot ba sad kon makainom na gani ang tawong hilumon mahimo namang sabaan. Di nata makontento nga mokanta bisag walay duyog kay bahalag yabag mosing-al man jud sa video5.
Sa panahon nga mag-away sila, kining mga bata dali rang makalimot ug dili madinumtanon, away sila karon unya dapit amigo napod lahi natong mga hamtong tungod kay ug mag-away man galing tinuig nga magbungol, mabaw kaayo ug buot ug usahay dili na maestoryahan. Mao nga husto gayod ang giingon ni Jesus gawas kon mausab kamo ug mahimong usa ka bata dili gayod kamo makasulod sa gingharian sa langit, kay ang gingharian sa Dios ila sa sama niining mga bataa. Timan-i ninyo kini; ang dili modawat sa paghari sa Dios sama sa usa ka bata dili mahisakop niini.
Busa kini ang hagit alang kanatong tanan, ang pagkat-on kanunay gikan sa kayano sa mga bata. Ang hagit nga sa atong pagduol ngadto sa Dios Amahan, kinahanglan isul-ob nato ang kinaiya sa usa ka bata sa iyang pagkamasaligon, pagkamapaubsanon, pagkamapailubon ug pagkamasinugtanon.
Labaw sa tanan, angay natong hinumduman nga ang mga bata dili lamang sila mga bata jud physically apan labaw sa tanan sila usab nga mga bata pa sa pagtoo, sila nga mga kabus, sa mga tawong walay gahom sa katilingban, sa mga tawong makasasala, mga tawo nga linupigan, mga tawo nga giyatakan sa ilang katungod ug mayokmok. Busa ang kaluwasan is not for adults only kon dili alang sa tanan...ang panawagan mao nga mahimo kitang usa ka bata apan dili usab magbinata...
Sa ato usab nga pagsaulog niining kapisathan sa Santo Niño iapil usab nato sa atong mga pag-ampo ang mga kabataan nga biktima sa mga ginadili nga droga, biktima sa abortion, child labor, exploitation, mga kabataan nga naglatagaw sa kadalanan ug biniyaan sa ilang mga ginikanan....

ANG BINHI

Usa sa mga misikat kaayo nga panultihon sa tagalog mao ang “Pag may itinanim, may aanihin” o “Pag may isinuksok, may madudukot”. Nindot kaayo dili ba? Tungod kay magpahinumdom man kini kanato nga kinahanglan maningkamot jud ta aron duna tay maani. Sama sa akong giingon niadtong miaging Dominggo kon gusto ta ug hayahay nga ugma kinahanglan nga magpundar karon aron hayag ang imong kaugmaon. Your future, our future, ang atong kaugmaon magdepende kon giunsa nato pagkinabuhi karon.
Apan sa laing bahin kining maong panultihon gituis na sa paglabay sa panahon, ngano man tungod kay karon naay daghang mangani, mo harvest bisan walay gitanom. Dunay mga tawo nga gustong mobaligya ug agal2x apan dili motanom, dunay gustong moihaw ug manok apan dili mamuhi, ganahan mobaligya ug guma bisan walay sanggutan, gustong mangopras bisag walay kalubihan. Hay buhay, ambot nga dunay mag tawo nga ingon niini, magpasayon lang ug gustog hayahay apan dili gustong magbudlay. Ang sulti ra ba ni San Pablo si kinsa kadtong dili motrabaho dili usab mokaon.
Busa tinuod usab ang ginaingon nga dili tanan nga atong ipugas maoy atong maani apan kinahanglan usab nga magbantay tungod kay matud pa nila “Kung ano ang iyong itinanim ay siya ring aanihin” kon magtanom ka ug gugma sa imong kasingkasing hinaot gugma usab ang imong anihon, apan kon magtanom ka ug pagdumot kasuko usab ang imong maangkon kay si bisan kinsa nga magtanom ug hangin moani gayod ug bagyo.
Mga igsoon sayod kita nga ang pagtubo sa usa ka tanom o binhi nagdepende kon giunsa mo usab pag-andam ang yuta nga imong tanman.
Sa ebanghelyo nga atong nadungog, ang upat ka klase sa yuta diin nangatagak ang mga binhi nagsimbolo usab sa managlahi nga paagi sa pagdawat sa pulong sa Ginoo. Sama sa giingon ni Jesus, ang mga binhi nga nangahulog ngadto sa agianan mao kadtong mga tawo nga nakadungog sa mensahe sa gingharian apan wala makasabot niini, miabot ang yawa ug gisakmit ang gipugas ngadto kanila.
Ang binhi nga nahulog sa yutang batoon mao ang mga tawo nga malipayong midawat sa mensahe sa pagdungog nila niini, apan dili kini makagamot diha kanila ug dili molahutay. Busa pag-abot sa mga kalisdanan ug mga paglutos tungod sa mensahe, moundang dayon sila.
Ang mga binhi nga nahulog sa dapit sa mga sampinit mao ang mga tawo nga nakadungog sa mensahe, apan ang mga kabalaka bahin niining kinabuhia ug ang gugma bahin sa mga bahandi molumos sa mensahe ug dili sila makapamunga.
Apan ang mga binhi nga napugas sa maayong yuta mao ang mga tawo nga nakadungog ug nakasabot sa mensahe ug namunga sila, may mamunga’g taggatos, ang uban tagkan-uman, ug ang uban tagkatloan.
Ang pangutana, hain man niining upat ka klase sa yuta atong Makita ang atong kaugalingon karon? Sa yutang agianan ba? Sa yutang batoon ba? Sa yutang puno sa sampinit ba? O sa yutang tabunok ba hinoon?
Tingali ang uban, moingon ako naa ko sa number one, number two, number three, or number four. Sayon ra kaayo ang pagrate sa atong kaugalingon sumala usab sa atong gikinabuhi apan abi bitaw ninyo ang tinuod walay bisan usa kanato nga makaingon naa ko sa number one, number two, number three or number four tungod kay sa mosugot ta ug dili kining upat ka klase yuta naa sulod sa atong pagkatawo.
May mga panahon nga nahimong tang sama sa yuta nga agianan, sa yutang batoon, puno sa sampinit labi na ug manawagan na gani ang pari ug pahina daghan ang magpabungol-bungol. Labi nag mangayo ang pari ug contribution, ang uban moingon labi sa bukid, sus! amutan na sad.
Apan dunay mga tawo nga bisan dili na kinahanglan sultihan sila na mismo ang modulo ug motanyag sa ilang tabang ug alang kanako kini sila ang mga tawo nga miturok ug mitubo sa yutang tabunok nga nakapamunga gayod.
Sa makausa pa akong balikon pagsulti nga ang gidaghanon sa atong maani wa mag-agad sa klase sa binhi kon dili nagdepende kini sa panahon, sa pag-atiman ug sa klase sa yuta. Labaw sa tanan nag-agad sa grasya ug panalangin sa Ginoo.
Sa laing bahin sa among annual meeting sa mga catechetical directors ug coordinators, gipasabot ug gipaamgo kami pag-usab sa kabililhon sa ketisismo alang sa mga bata tungod kay alang sa simbahan sila mao ang mga binhi sa atong paglaom, ang pag-asa ng bayan matud pa ni Rizal.
Sila mao unya ang magsilbing dan-ag, iwag o kahayag sa kangitngit sa kalibutan. Apan ang pangutuna kon giunsa man nato pagtanom o pagtisok ang maong binhi sa kahayag ngadto sa atong mga kabataan?
Sa katapusan, tuguti nga akong tapuson ang akong pamalandong pinaagi sa usa ka estorya sa kinabuhi ni Michael. Sa nasud sa Maryland this is a documented story, a true to life event. Ang ginikanan ni Michael usa ka devoted nga Catholic, suod sila sa simbahan ug sa matag adlaw nga Dominggo kon manimba sila ilang kuyugon si Michael hangtud nga nadevelop kang Michael ang kinaiya sa pagkamahigugmaon sa Dios.
Hangtud nga miabot ang panahon nga nagsabak ang iyang inahan. Sa tuyo nga mapabati nila ang ilang pagmahal sa bata nga naa pa sa sabakan matag adlaw si Michael ug iyang papa, ilang kantahan ang bata, ang maghod ni Michael sa sabakan sa iyang inahan. Kini ilang gihimo sulod sa siyam ka bulan hangtod nga miabot ang panahon nga manganak na ang iyang mama.
Nabilin si Michael sa ilang balay nga puno sa excitement ug samtang didto sa hospital natawo nga normal ang usa ka bata nga babaye. Apan dunay problema tungod kay bisan unsaon ug pikpik sa mga doctor ang bata dili man jud mohilak ug gibutang nila ang bata sa incubator for observation. A day or two after ang mga doctor miingon ngadto sa mga ginikanan ni Michael nga ang bata mamatay.
Miuli ang papa ug gisultihan si Michael sa balita. Michael ang imong igsoon moadto na sa langit miingon ang iyang papa. Natingala ang bata nganong sayo raman kaayo…human siya pasabta sa iyang papa si Micahel miingon nga mobisita siya sa iyang igsoon sa hospital.
Sa hospital dili pa unta pasudlon si Michael sa mga doctor apan human nila madungog ang pulong ni Michael gusto nakong bisitahon ang akong igsoon to say goodbye sa dili pa siya mogikan sa langit. Tuod man face to face sa iyang igsoon miingon si Michael samtang iyang gigunitan ang kamot sa bata, babay girl moadto naman diay ka sa langit apan sa dili ka pa molakaw tuguti nga akong kang kantahan to let you know how much I love you. Ug mikanta siya, you are my sunshine my only sunshine who makes me happy when skies are gray, you never know dear how much I love you, please don’t take my sunshine away…with that miliso ang bata, mihilak ug nabuhi…
Mga igsoon imagina nga si Jesus mismo ang nagkanta niini alang kanimo…you are my sunshine my only sunshine who makes me happy when skies are gray, you never know dear how much I love you; please don’t take my sunshine away. Kita mao ang iyang kayahag sa kalibutan, makakat-on unta kita sa pagpasiga sa maong kahayag alang sa uban nga gitisok kanato panahon sa atong bunyag…